Busturialdea herri boteretik eraikiz
Bilbao Bizkaia Ur Partzuergoak Busturialdeko Partzuergoa bere sarean sartzea erabaki zuen urteko azken Batzar Nagusian. Horrek Busturialdeko Ur Partzuergoaren pribatizazioa suposatzen du; eta, beraz, oinarrizko baliabide bat kudeatzeko aukera kentzen dio herriari. Gainera, pribatizazioaren ondorioz, IBEX indizeko Espainiako enpresek milioi askoko kontratuak lortuko dituzte kudeaketa honen ondorioz. Berriro ere, EAJren taldeko enpresak eta bere klan garrantzitsuenetako batek, Atutxa familiak, milioika euroko kontratuak lortuko dituzte. Gure poltsikoetatik aterako den dirua.
Argitaratutako datuen arabera, Atutxaren taldeko enpresek ematen dizkien kontratu publikoen bidez baino ez dute lan egiten, bere alderdiak zuzentzen dituen erakundeek banatzen dituzte kontratuak, eta azken urteotan 68 milioi euro baino gehiago jaso dituzte. Egoera honetan, baliabide natural baten pribatizazio-pastelean, IBEX35eko enpresa multinazionalek ere jasotzen dute bere zatia : Acciona SA, Ferrovial, DAM, DRACE, azken hau Florentino Pérez harrapari kapitalistaren taldekoa.
Gure eskualdean oinarrizko ondasun batez jabetzeak erruduna du, eta EAJ da, Busturialdeko Ur Partzuergoa kontrolatzen duen alderdia. EAJ kapitalaren zerbitzura dagoen alderdiaren adibide argia da. Demokraziaz hitz egiten du hauteskundeetan, baina inoiz ez dio negozio hauen informaziorik ematen herriari eta honez gain, ez ditu kontsultak burutzen honelako gai garrantzitsuetan ere. Hain errotuta eta herritik urrun dauden politikari neoliberal horiek botoa eskatzerakoan bakarrik gogoratzen dira gutaz. Haiek oso argi dute bere kudeaketa eredua; hau da, erakundeen kudeaketa lortzea herriaren ondasunak pribatizatzeko eta desjabetzeko. Kudeaketa publikoen eremu guztiak pribatizatzen dituzte etekin ekonomikoak lortzeko.
Burgesiak gure bizitzako eremu guztiak, baliabideak pribatizatzen ditu herriaren kontrola areagotzeko. Honen aurrean ezin gara etsipenean erori, are gutxiago kikildu. Euskal herri langilearen batasuna eta antolaketaren bidez borrokatu behar dugu Kapitalaren diktadura honen aurka, soilik herri boteretik eraikitako Euskal Herri sozialistak askatuko gaitu.
Independentzia eta Sozialismoa.
Jesus Mari Alberdi Arrizabalaga Txirri
Jardun kordinadora
