Vueltan Euskal Herriaren ikurrak erakusteko deia egin du Gure Eskuk
Busturialdeko zenbait herritik pasako da irailaren 3an eguerdian. Gernika-Palestinak ere deialdiak egin ditu.
Vuelta Euskal Herrira iritsiko da irailaren 2an [martitzena] eta Busturialdera Bermeotik sartuko da irailaren 3an [eguaztena]. Hain zuzen ere, Bilbon hasi eta amaituko da lasterketako 11. etapa eta Gure Eskuk Euskal Herriaren ikurrak erakusteko deia egin du. Aurreikuspenen arabera, 14:25ean inguru helduko da tropera Sollubera eta besteak beste Mundaka, Sukarrieta, Forua, Murueta edo Arratzu zeharkatuko ditu 14:50ak bitartean.
Gure Eskuk, Vuelta Euskal Herrian dabilen bitartean, “hemen nazio bat” dagoela, zazpi lurraldez osatutakoa, eta “herri honek taupada bizia” duela erakusteko deia egin du, errepide bazterrak euskal herritarrok ordezkatzen gaituzten ikurrez beteta.
“Txirrindularitza lasterketak kirol probak baino askoz gehiago dira euskal herritarrontzat, festa, komunitatea egiteko une eta gure herriaren erakusleiho bihurtu baikenituen aspaldi. Historikoki, txirrindularitza lasterketetan (Tourra, Vuelta, Itzulia…) euskal herritarrok geure herriaren taupada erakutsi izan diogu munduari: berezko hizkuntza eta kultura dituen nazio bat, bere ikurrak harro haizatzen dituena eta kirola grinaz eta errespetuz bizi duena”, adierazi du Gure Eskuk.
“Apirilean ere egin genuen, Itzulian: errepideak ikurrinez eta nafar banderez bete genituen eta herri honen taupada erakutsi genion munduari. Atera gaitezen berriz ere errepideetara eta adieraz dezagun ozen bere etorkizuna libre eraiki nahi duen herri bat dagoela hemen”.
Aldarrikapen bikoitza
Horrez gain, Gernika-Palestina herri ekimenak ere deialdia egin du irailaren 3rako Bermeon. Nestor Basterretxean jarri dute hitzordua 13:30ean eta bertara ere ikurriñak edota Palestinako banderak eramateko deia egin dute. Era berean, Bilboko helmugara ere ikurrok eramateko eskatu dute.
