Turisten eta egoiliarren arteko oreka lortzeko, jardunbide egokien gidaliburua martxan
Gernika-Lumoko Turismo Bulegoak bisita gidatuen jasangarritasuna bermatzeko eta espazio publikoaren saturazioa saihesteko neurriak jasotzen dituen gidaliburu bat bultzatu du.
Argazkia: Urremendi Gernika-Lumoko Turismo Bulegoak ekimen berri bat jarri du martxan, herrian “bisita gidatuen jarduera arautzeko eta turisten eta egoiliarren arteko elkarbizitza bermatzeko” asmoz: Gernika-Lumoko Bide Publikoko Bisita Gidatuetarako Jardunbide Egokien Eskuliburua. Gida turistikoen enpresekin, sektoreko elkarteekin eta Euskadiko hartzaileekin elkarlanean egingo da ekimen hau, Gernika-Lumoko Udalak adierazi duenez, eta euskaraz, gaztelaniaz, ingelesez eta frantsesez egongo da eskuragarri Aste Santurako.
Helburua argia da: tokiko turismo-sektorean jasangarritasuna sustatzea eta Garapen Jasangarrirako Helburuen (GJH) ezarpena indartzea. “Gernika-Lumo kalitatezko helmuga izatea nahi dugu, non jarduera turistikoak herriaren nortasuna errespetatu eta bisitatzen gaituztenen esperientzia hobetuko duen”, azaldu du Nerea Revuelta Turismo zinegotziak.
Operadore turistikoentzako hainbat konpromiso proposatzen ditu dokumentuak, gainera. Neurri aipagarrienen artean, talde bakoitzeko parte-hartzaile kopurua mugatzea dago, gehienez 30 pertsonako muga ezarriz. Arau horren xedea pilaketak saihestea eta zerbitzu gidatuaren kalitatea hobetzea dela esan dute, oro har. Kutsadura akustikoa murriztea ere gomendatu dute, soinu-anplifikadoreen erabilera debekatuz eta irrati-giden erabilera sustatuz.
Azalpenak emateko geldialdiak gune estrategikoetan egin beharko dira, hain zuzen ere, “egoiliarrei eta merkatariei ahalik eta traba gutxien” egiteko. Halaber, bisitak hasteko eta amaitzeko lekuak modu egokian hautatzea proposatzen du udal gobernuak, “eraikin edo merkataritza-establezimenduetarako sarbideetan blokeoak saihestuz”. Gainera, zirkulazio arauak bete behar direla azpimarratzen da, batez ere bidaiariak jaso eta jaisteko guneetan.
Turismoari murrizketak ezarri dizkioten beste hirietan ez bezala, Gernika-Lumon eskuliburuarekin bat egitea borondatezkoa izango da, eta horrela adierazi du udalak. Revueltak azpimarratu du, alegia, udalerriko bisitari-kopurua parametro jasangarrien barruan dagoela: “Gernika-Lumoko turismoa ez da arazoa. Orekatua, jasangarria eta kalitatezkoa izaten jarraitzea nahi dugu”.
“Ondare eskaintza zabalarekin eta ibilbide turistikoak errazten dituzten oinezkoentzako espazioekin, hiribilduak iraunkortasunarekin konprometitutako helmuga gisa posizionatu nahi du”, gaineratu du udal gobernuak. Horregatik, gidaliburuak “erreferentziazko tresna” izan nahi du sektorearentzat, “ingurunea eta bertako biztanleak errespetatzen dituen turismoa bermatuz”.
