Kirola eta elkartasuna, dena hasten den lekuan
Euria albo batean utzi, eta kirolaz gozatu dute Busturiko txiki zein nagusiek gaur (martxoak 22). Euskal Non League Day-aren hirugarren edizioan, oinarri futbola hauspotzea bilatu dute, egun guztiko egitarauaz gozatuz.
Dena hasten den lekuan. Busturian. Euria goitik behera esnatu da gaur Urdaibai Biosferaren bihotza den herria. Lokatza izan da nagusi, gaur, familia eta lagun artean ospatzen ari diren ekimenean. Euskal Non League Day-aren hirugarren aldia dute gaur gidari, halaber, herritarrek. Oinarri futbola aitortu, ikusarazi eta laguntzea helburu izanik, Busturia Ur-Zelai Klubak Athletic Fundazioaren ekimenarekin bat egin du.
Gizonezkoen futbol profesionaleko nazioarteko geldialdietan jendea futbol partida ez profesionaletara joatea sustatzeko sortu zen Britainian ekimen hau, 2010ean. Athletic Clubek, adibidez, bere fundazioaren bitartez, 2023an egin zuen bat ekimenagaz, eta gaur ari dira Euskal Non-League Day ospatzen, athleticzaleei klubarekin hitzartutako 179 taldeen zelaietara joateko deia eginez. Dena hasten den lekuan lelopean ekin diote ekimenari, hurrenez hurren, Busturian.
Busturian ez dute eguraldia oso aldeko izan, baina horrek ez du inondik ere giroa urratu. “Gogotsu” agertu dira herritar txikienak, baina are gehiago, txiki horien gurasoak. Nor baino nor gogotsuago, haien arteko partidarekin hasi dute eguna. Lokatzez bete, blai egin, baina aurrera egin dute, elkarren aurka baino, elkarrekin jokatuz. “Pena da euria izatea, baina horretarako prest etorri gara. Gozatzeko prest gaude”, gaineratu dute gerturatutakoek.
Futbola nagusi, baina askotarikoetarako kutsua ere izan dute. Kirola eta jan-edana uztartu ditu ospakizunak, herri kirolak, karro-poteoa eta herri bazkariak ez baitira falta izan. Sustabiz Fundazioak gorputzetako berotasuna mantentzen lagundu du, gainera, herri kirol desberdinak probatzeko aukerarekin. Gainera, txikienez gain, nagusiek ere probatu dituzte herri kirol diziplina desberdinak. Sustabiz Fundazioak ere egin du, ondoren, erakusketa.
Aurreikuspenak ederto egin dituzte antolatzaileek. Izan ere, astean zehar azaldu dutenez, euria egingo balu frontoian jarraituko zuen festak. Beraz, dena kontrolpean dute gaur. 150 pertsona inguru elkartu dira, bere gain, herri bazkarira, jai giroarekin goi-goitik jarraitzeko, eta arratsaldean, berriz, futbol ekitaldi nagusia izango dute, 17:00etan: Beteranoak, lehenengo Busturiako jokalariak Ur-zelaiko erregional mailako jokalarien kontra jokatuko dute. Horrez gain, iluntzera arte luzatuko da oinarri futbola hauspotzeko jaia; izan be, DJ Jaikide arduratuko da herriko jai giroa mantentzeaz.
