Oleta landa-eremuko auzobidea konpondu dute
Abenduko euriteek Baldatika auzoan eragindako "kalte handiak" konpondu ditu Foruko Udalak. Konponketa lanak egiteko aurrekontua 30.600,90 eurokoa izan da, eta aldundiaren laguntza jaso dute.
Argazkia: Foruko Udala Foruko Udalak abenduko euriteek Oleta landa-eremuko auzobide batean eragindako “kalte handiak” konpondu ditu. Eremu horretan lur jausiak izan ziren, eta horrek lanak “premiaz” egin beharra ekarri du, “auzotarren bide-segurtasuna bermatzeko”.
Udaletik azaldu dutenez, Baldatika auzoan “bereziki kaltetua” izan zen baserri batera sartzeko bidea: “Hormigoizko plataformaren azpian lur-jausi bat gertatu zen, beheko sasitzako landareriaren zati handi bat arrastaka eraman eta bidearen zati bat airean geratu zen, oinarri sendo barik, eta ondorioz, bidea hegan geratu zen”, zehaztu dute.
Konponketa lanak urgentziaz egin dituzte, eta aurrekontua 30.600,90 eurokoa izan da. Lanok aurrera eramateko baina, udalak Bizkaiko Foru Aldundiaren laguntza ekonomikoa jaso du, “ezustekoetarako laguntza-atalaren bidez”. Hala, aldundiak aurrekontu guztiaren %81a ordaindu du: 24.786,73 euro, eta gainontzekoa, 5.811,17 euro, udalak.
