Bi auzobide asfaltatu dituzte, "segurtasuna hobetzeko"
Udalerri osoan «irisgarritasun ona» izateko estrategian kokatzen diren lanok egiteko 48.400 euroko inbertsioa egin du Busturiko Udalak.
Iturriondoko trenbide pasagunetik Abiñabururako bideaBusturiko Udala Herritarrek asko erabiltzen dituzten bi errepide konpondu ditu Busturiko Udalak. Nabarmendu dutenez, herriko bide azpiegituren «segurtasuna eta irisgarritasuna hobetzeko» helburuaren barruan sartzen dira egindako lanak. Izan ere, udal gobernu taldearen agintaldiko konpromisoan jasotzen den helburua da.
Argazkia: Busturiko Udala
Lehen jarduketa Ispilluetako zubitik Txakurren Kanposantue izeneko guneraino doan tartean egin dute; bidea errepide orokorrarekiko ia paraleloa da, eta Arrotegi zaharren egoitzaren atzealdera, aparkalekura eta hainbat etxebizitzatara heltzeko bidea da. Auzobidea «egoera txarrean» zegoen, zuloak eta arrakalak zituen, eta, horregatik, zoladura berregokitu behar izan dute, «istripuak saihesteko eta segurtasuna bermatzeko». Udaletik jakinarazi dutenez, lanketa egiteko, Iberdrolak «inguruko aireko lanak amaitzearen zain» egon dira, baita Bilbao Bizkaia Ur Partzuergoak hornidurarako hodi berriak instalatzeko lanak bukatzearen esperoan ere.
Bigarren jarduketa Iturriondotik Abiñaburuko etxebizitza guneraino doan bidean egin dute. Bide hori konpontzea «beharrezkoa» zen, «obrako ibilgailu astunen joan-etorriagatik».
Udalerri osoan «irisgarritasun ona» izateko estrategian kokatzen diren lanok egiteko, 48.400 euroko inbertsioa egin du udalak, zoladura konpondu eta berritzeko, errepideak asfaltatzeko, pasabide goratuak egiteko eta seinale horizontalak jartzeko.
Argazkia: Busturiko Udala
