Independentzia, amesten duten Euskal Herria eraikitzeko
Euskal Herriko gazte independentisten topagune izango den Gazteon Eskutik ekimenaren atarian, Busturialdeko Ernaik Busturialdetik Independentziara eguna antolatu du zapaturako [martxoak 15], Gernika-Lumon, "independentziaren aldeko borrokan jarraitzeko grina" pizteko.
Aitor Bilbao eta Leiore Moreno Busturialdeko Ernaiko kideakBusturialdeko Ernai Asko dira gaur egun euskal gazteriaren beldur eta erronkak, hala nola, etxebizitza eskuratzeko zailtasuna, lan-merkatuaren prekarietatea, eraso matxisten eta faxismoaren gorakada, zaintza-sistema eta euskararen aurkako oldarraldia… Testuinguru horren aurrean, erronka horiek erdigunera ekarri eta Euskal Herria “aske, sozialista eta feministara salto egiteko” topaketa antolatu du Ernai Gazte Antolakundeak.
Gazteon Eskutik izenpean, apirilaren 17tik 20era gazte independentisten topalekua izango da Berriozar: “Amesten dugun Euskal Herrira salto egiteko indarra hartuko dugu: Euskal Herria aske, sozialista eta feministara salto egitekoa”, azaldu du Aitor Bilbao Landa Ernaiko kideak. Antolakundetik bai mundu-mailako erronkei, bai «Euskal Herriaren askapen prozesuaren ikuspegitik jauzia egiteko» aukerei dagokienez “une erabakigarri batean” daudela zehaztu dute, erronkak lotuta daudela azpimarratzeagaz batera: “Maila-globaleko erronkei aurre egiteko eta bidegurutze historiko honetan posizio eraldatzaileetara bultza egiteko bide bakarra independentzia baita”.
“Gero eta gehiago gara etorkizunari begira independentzia baino ikusten ez dugun gazteak”, adierazi du Leiore Moreno Hidalgok, ikasturteari milaka gaztek Donostian eman zioten hasiera edota urriaren 12an “ospatzeko ezer ez” dutela aldarrikatzeko Tafallako kaleak hartu zituztela gogoratuta. Izan ere, gazte independentistak indartzen daudela, eta amesten duten utopia «geroz eta hurbilago» dagoela uste dute: “Gazteon Eskutik indar guzti horren bilgune izango da”. Hala, apirileko ekimenak Euskal Herriko gazte independentisten formakuntza politikorako eta aisialdirako tartea eskainiko du: gaurkotasuna duten hitzaldiak. bestelako formakuntza eskaintzen duten tailerrak, jolasak, kontzertuak…
Leiore Moreno: “Ezin dugu Euskal Herri independentista batetaz hitz egin, nahi eta behar dugun Euskal Herria ez bada feminista, euskaltzalea eta sozialista”
Era berean, Gazteak testuinguru “arrotz” baten aurrean daudela nabarmendu dute, indibidualismoaren eta faxismoaren gorakadak gizartea gero eta gehiago martzen dutelako. Horren aurrean, Ernaitik «ezinbestekotzat» dute belaunaldi gazteen artean, “aldarri antifaxista identitate independentista batetik sortzea”: “Ezin dugu Euskal Herri independentista batetaz hitz egin, nahi eta behar dugun Euskal Herria ez bada feminista, euskaltzalea eta sozialista. Are gehiago, ezin dugu independetismoaz hitz egin Euskal Herria ez bada harrera herria. Ezta gazteok lan eta bizi baldintza duinak ez baditugu”. Hala, amesten duten Euskal Herria eraikitzeko lanean dihardutela zehaztu dute, hamaika proposamen dituztela gogoratuta.
Beharrak erdigunean.
Ernaitik etxebizitza turistikoen gorakadaren eta alokairuen garestitzearen ondorioz etxebizitza eskuratzea “gero eta zailagoa” dela salatu dute: “Gazte askok ez dute etxebizitzarako sarbiderik, eta erakunde publiko askok etxebizitzaren merkantilizazioan izan duten konplizitatea salagarria da”. Modu berean, lan merkatuak gazteak prekarietatera bideratzen dituela azaldu dute, “lan-kontratu prekario eta soldata baxuen bidez”: “Lan-indar merke bihurtzen gara, eta horrek bizi-proiektu autonomoa garatzeko aukerak mugatzen ditu”. Horren aurrean, ezinbestekotzat ikusten dute “merkatuaren logikatuk kanpo dauden alternatibak sortzea”.
“Euskal Herria feminista, euskaltzalea eta sozialista den herria izango da ala ez da izango. Guk hiru ardatz hauek elkarri lotuta dauela ulertzen ditugu”, nabarmendu dute bai Bilbaok, bai Morenok. Azaldu dutenez, antolakuntza feminista “funtsezkoa” da sistema neoliberal zisheteropatriarkalaren aurrean: “Neska, trans eta bollera gazteek zaintza-lanak baldintza prekarioetan egiten dituzte, eta zer esanik ez emakume arrazializatuen kasuetan. Hauek, migrante izate hutsagatik, lan-esplotazioaren eta eskubide-urraketa sistematikoen biktima dira”.
Ernaiko kideek Euskal Herria “anitz” batean sinisten dutela aldarrikatu dute, euskara “kohesio sozialerako tresna” izan behar dela defendatzeagaz batera. Gazteen artean euskararen erabilera geroz eta txikiagoa dela “agerikoa” dela onartu, eta hori irauli ahal izateko borrokatzen jarraituko dutela azpimarratu dute, euskaraz biziko den belaunaldia direla zehaztuta.
Hezkuntzari dagokionez, egungo eredua “sistema neoliberalari estuki lotuta” dagoela adierazi dute, horrek merkantilizazio prozesu sakonek baliabideen eta eskaintzen den zerbitzuaren kalitatea murriztea ez ezik, “ikasleen prekarizazioa nabarmen areagotzea” eragin duela salatuta.
Aitor Bilbao: “Uste dugu aitortza egin behar zaiela eskualdean antolatzen diren antolakundeei”
Aurrean erronka “zailak” badituzte ere, euskal gazteria orokorrean “aktibo” dagoela uste dute, eta horien adierazletzat hartzen dituzte gazte feministak, euskara taldeak, ikasle mugimenduak, gaztetxeak…: “Uste dugu aitortza egin behar zaiela eskualdean antolatzen diren antolakundeei, adibide batzuk jartzearren, Enbata dugu Gernikako Gazte Feministen talde, Gernikako Mobidu eta Bermeo Etxalak gazteen euskara talde eta Ikama ikasle antolakunde nazionala ere antolatzen da eskualdeko zenbait ikastetxetan”. Eragile bakoitzak amesten duten “zapalkuntzarik gabeko Euskal Herria” eraikitzeari ekarpena egiten diola zehaztu dute: “Horregatik, dei egiten diegu oraindik antolatuta ez dauden gazte feminista, sozialista eta independentistei pausu bat aurrera eman eta eragileetan parte hartzera”.
“Aniztasun horrek balio eraldatzaile handia du, baina urrats bat gehiago ematea dagokigula uste dugu: gazte ahalik eta gehien independentziaren alde lerratzera pasatzea”, nabarmendu dute, erronka nagusia “nazio-pultsua berrindartu” eta euskal gazteriaren artean independentismoa nagusi izatea dela aldarrikatuta.
Independentistak elkartzea.
Aipatutako helburu eta erronkak betetze aldera lanean jarraitzeko, zapatuan [martxoak 15] Busturialdetik Independentziara eguna antolatu du Busturialdeko Ernai Gazte Antolakundeak Gernika-Lumon. Moreno eta Bilbaoren ustez, «mugarri garrantzitsua» izango da, “independentziaren beharrizana aldarrikatzea, eskualdeko gazte independentistak elkartzea eta amesten dugun Euskal Herria aske, sozialista eta feminista” irudikatzea bilatuko baitute.
Moreno: “Eskualde-eredu propioa aldarrikatu nahi dugu”
Busturialdeko Ernaitik eskualdeko gazte independentistak batzeko anbizioz antolatutako egitarauak nazioarteko zein eskualde mailan antolatzera eraman zituzten “ardatz ezberdinak” izango ditu ardatz, hala nola, “faxismoaren gorakada edota herriko saskibaloi entrenatzailearen kasua”. Horrez gain, eskualdeagaz zuzenean lotutakok ere erdigunean jarriko dituzte. “Guggenheim Urdaibai proiektuarekin ikusi dugun bezala, gure beharrizanei erantzun ez eta eskualdea saldu eta postal huts bilakatu nahi dutenen aurrean, eskualde-eredu propioa aldarrikatu nahi dugu: gazteontzat bizi eta lan baldintza duinak bermatuko dituena, feminista, euskalduna, biosfera zainduko duena eta abar”, azaldu du Morenok. Bide horretan, uste dute “askapen nazionalak askapen sozialerako baldintzak” ekarriko dituela, eta horregatik, indenpendentzia aldarrikatzeko baliatuko dute Busturialdetik Independentziara eguna.
Egun guztiko egitaraua.
Hala, zapaturako egun guztiko egitaraua prestatu dute, 12:00etan elkartuko dira ekitaldi politikoan, Elai Alai aretoan. Hori bukatuta, «marianito pintxada» izango dute Arrano Tabernan, Harizpe Txokoan Gazte Bazkarian elkartu aurretik. Tripak ondo beteta, 17:30ean, bakarrizketez gozatuko dute, triki-poteoagaz jarraitu orduko. Ekimena goizaldera arte luzatuko da, DJ Matxingen emanaldiagaz.
Ernaiko kideek eguerdiko ekitaldi politikoan jarri nahi dute fokua, eta “hitzaldi-formatu ohikotik irteteko anbizioa” izango duela aurreratu dute: “Ernai Gazte Antolakundeak zein gazte mugimenduak azken urteotan maila nazionalean zein lokalean egin dituen ekimenen errepasoa egin nahi dugu”. Era berean, gazte borrokan zen askapen nazionalaren alde borrokan aritu diren aurreko belaunaldiei, zein oraindik borrokan dabiltzanei aitortza egingo dietela iragarri dute. Azkenik, bertaratzen direnei “independentziaren aldeko borrokan jarraitzeko grina» zabaldu eta gazte antolakuntzarako deia egingo dutela zehaztu dute. Antolakundetik bertaratzera animatu dituzte Busturialdeko gazte eta independentistak, “independentzairen aldarria mahai-gainean jartzeko beharra” dagoelako.
