Sutondoak berotzen hasita
Txitxiburduntziaren inguruan bilduko dira datozen egunotan Busturialdearen luze-zabaleko hainbat txokotan.
Txitxiburduntziaz gozatzeko aukera paregabea edukiko dute Busturialdeko herritarrek, egunotan. Suaren inguruan txorizoak erretzea izango da horietako gehientsuenen ardatz nagusia, baina ez bakarra. Mendatarrek, domekarako [otsailak 23] egun osoko egitaraua prest dute. Beste urte batez, ohiturari jarraiki, Bastozte Egunagaz batera egingo dute Zuhaitz Eguna. 11:30ean jarri dute hitzordua Artape aurrean Kalbariorantza joateko. Bertan egingo dute Zuhaitz Eguna, hau da, aurreko urteetan landatutako zuhaitzak bisitatuko dituzte, baita berriak landatu ere. Familia plan “bikaina” dela esan dute antolatzaileek eta bertaratzeko deia egin dute “goiz bikaina” pasatzeko.
Eguerdian, landaketan egindako esfortzuaren ostean indarrak berreskuratzeko txitxiburduntzia egingo dute mendatarrek. 13:00etatik aurrera Taberna Barri inguruan elkartuko dira. Goizetik hasiko dira sua prestatzen eta mendizaleak heltzen direnerako prest izatea nahi dute. Gogoratu dute bakoitzak bere zotzak eraman beharko dituela eta beste guztia antolatzaileek jarriko dutela. “Basatozte Eguneko helburua ume, guraso eta aitona-amonak elkartzea eta guztiek parte hartzea da, eta bide batez ohiturei eustea”, azaldu dute. Hain zuzen ere, antolakuntzarako herritarren laguntasuna beharko dutela esan dute eta parte hartzeaz gain, laguntzeko deia egin dute.
Hainbat tokitan, mendi ibilbideak edo martxak eginez ospatuko dute Basatozte Eguna. Errigoitiarrek Bizkaiganera mendi martxa egingo dute domekan; ibilbide luzeak 13 km izango ditu, eta laburrak, berriz, 7 km. Elizaldeko txitxiburduntziagaz biribilduko dute eguna. Busturiarrek ere mendi aldera joko dute, domekan 08:30ean Altamiran hitzordua ipini baitute. Ondoren, Paresi auzoak hartuko du jai aldartea; herriko txistulariak arduratuko dira txitxiburduntzia girotzeaz.
Ajangiztarren txitxiburduntzian parte hartzeko izena eman behar da, eta hilaren 28a da horretarako azken eguna. Pertxamendi txokoan izena eta txitxiburduntzi idatzita duen gutun-azala utzi behar da kutxa gotorrean. Nagusiek 15 euro ordaindu behar dituzte; umeek, 6 euro.
EGITARAUAK
AJANGIZ
Martxoak 2 (domeka)
11:00. Txitxiburduntzia, Mendietako plazan. Pertxamendi txokoan izena eman behar da. Epemuga: otsailaren 28a.
BUSTURIA
Etzi
08:30. Mendi martxa, Altamiratik hasita, Mape Mendi Taldeagaz.
13:00. Txitxiburduntzia Paresin, Busturiko txistulariek girotuta.
EA
Otsailak 27 (eguena)
17:30. Txitxiburduntzia Natxituko Bolatokian, Natxituko Jai Batzordeak eta Eako Udalak antolatuta.
EREÑO
Etzi
09:30. Txitxiburduntzia egiteko ibilbidea auzoz auzo, Eleizalden hasita.
ERRIGOITI
Etzi
09:15. Bizkaiganera mendi martxa luzearen irteera, Elizaldetik.
10:00. Bizkaiganera mendi martxa laburraren irteera, Elizaldetik.
GAUTEGIZ ARTEAGA
Etzi
11:00. Plazatik San Lorentzora irteera, han txitxiburduntzia egiteko. Aurreratu dute San Lorentzon ezin izango dela autorik aparkatu, eta, euria baldin bada, eskolan egingo dutela txitxiburduntzia.
GERNIKA-LUMO
Etzi
17:00. Txitxiburduntzia, Lumoko plazan, Elai Alai Dantzari Taldeak antolatuta. Horrez gain, umeentzako jolasak, umeen eta helduen aulki dantza txapelketa eta parrillada izango dira.
MENDATA
Etzi
11:30. Zuhaitz Eguna: iaz landatutako zuhaitzak bisitatzeko eta berriak landatzeko ibilaldia, Artapetik hasita eta Kalbarioraino.
13:00. Basatozte Eguna: txitxiburduntzia, Taberna Barri inguruan. Zotzak norberak eroan beharko ditu.
MURUETA
Martxoak 2 (domeka)
18:00. Txitxiburduntzia, Elizalden.
Ostean. Txokolate jana.
