Bizkaian kirola "garatzeko eta sustatzeko konpromisoa" berretsi du Bizkaialde Fundazioak
Hamaseigarren topaketan batu dira Bizkaialde Fundazioa osatzen duten enpresa, klub eta elkarteen ordezkariak, Bilboko Bizkaia Frontoian.
Leixuri Arrizabalaga Bizkaialde Fundazioaren Patronatuko presidente eta Euskara, Kultura eta Kiroleko diputatuak “lurraldeko kirolaren babesarekin konprometitutako erakundeen ahalegina” nabarmendu eta eskertu du. Era berean, eskerrak eman dizkie fundazioaren proiektua babestu duten enpresei, eta gizarte-erantzukizun korporatiboarekin duten “konpromisoa eta eskuzabaltasuna” azpimarratu ditu, gizartean “aldaketa esanguratsuak bultzatzeko” jarraitu beharreko adibide gisa.
Ekitaldian egon diren kirol-erakundeen “funtsezko zeregina” aitortu du, eta eskerrak eman dizkie beren dedikazio, ahalegin eta talentuagatik, “Bizkaiko kirola gorenera” eraman dutelako. Kirol-garapenarekin eta etorkizun handiko atleten prestakuntzarekin duten konpromisoa aintzatetsi du.
Gaur gaurkoz, 21 enpresa, 31 klub eta 39 talde biltzen ditu fundazioak, eta horien artean daude Bermeon Arraun Elkartea, Gernika Rugby Taldea eta Gernika KESB.
2023-2024 denboraldian Bizkaialde Fundazioak 1.075.000 euro bideratu ditu hamasei modalitatetan eta hogei kirol-diziplina desberdinetan lehiatzen diren 31 klub eta 39 talde babesteko, lurraldean kirola garatzeko eta sustatzeko etengabeko konpromisoa erakutsiz.
Arrizabalagak batasun eta lankidetza mezuak helarazi ditu: “Kirolak funtsezko zeregina dauka talde-lana eta pertseberantzia bezalako balioak sustatzeko tresna gisa, gure lurraldea, lehiakortasunagatik ez ezik, kirolaren etikan errotutako balioengatik ere aitortzen da. Talde-lana eta pertseberantzia dira, besteak beste, Bizkaialde Fundazioaren nortasunaren bizkarrezurra”.
