'Into The Ice' dokumentala dakar BBK Klima Zikloak
'Into The Ice' erakusketa ere ikusgai jarriko dute, Urdaibaiko BBK Klima Zentroan.
Espedizioko parte hartzaileak. Argazkia: Andrew Opila Klima Aldaketaren aurkako Nazioarteko Egunaren harira (urriak 24, martitzena), Andrew Opila argazkilari iparramerikarraren Into The Ice dokumentala dakar BBK Klima Zikloak; BBK Urdaibai Zentroan jarriko dute, 19:00etan. Iazko Mendi Film Zinemaldian “arrakasta handiz” estreinatu ostean, aipatu dokumentala izango da aurtengo BBK Klima Zikloaren pieza nagusia.
Into The Ice dokumentalak, Hego Amerikan, Darwin mendilerrora egindako nazioarteko espedizioa erakusten du Opilak, zientzia, esplorazioa eta alpinismoa uztartuta. Espediozio horretan lau euskal ordezkarik parte hartu zuten: Eñaut Izagirre eta Ibai Rico glaziologo eta geografoek (EHU), Jon Inoriza alpinista eta eskalatzaileak eta Jon Artano kazetariak. Bertaratzen direnek, jatorrizko bertsioan ikusiko dute dokumentala (ingelesez), baina euskarazko azpitituluekin.
Espedizioan parte hartu zuten Eñaut Izagirrek eta Ibai Ricok aurkeztuko dute filma. Ondoren, filmari buruzko eztabaida gidatuko dute, eta publikoaren galderak erantzungo dituzte. Goizean, DBHko eta Batxilergoko ikasleek izango dute dokumentala ikusteko aukera..
Ekimen honen bidez, BBK Klimak “kontzientziak mugiarazi” gura ditu, “ingurumenaren alde eta klima aldaketaren aurka”.
Erakusketa. Dokumentalaz gain, Into The Ice erakusketa ere ikusgai dago Urdaibaiko BBK Klima Zentroan. Bertan, ikerketarako zein hainbat jardueratarako erabilitako materiala, gailuak eta arropak erakusten dira. Informazio panelak ere badaude, espedizioaren helburuak eta nondik norakoak azaltzen dituztenak. Era berean, klima aldaketari aurre egiteko neurrien beharrizanaz ohartarazten dute bisitaria.
Klima Aldaketaren aurkako Nazioarteko Egunean bertan (urriak 24) erakusketa egun osoan izango dute zabalik. Ondoren, asteburuetan bisitatu daiteke, 11:00etatik 19:00etara, hilaren amaierara arte.
BBK Klima Zikloa gizateriak aurrean dituen ingurumen erronka garrantzitsuenetako batzuei buruzko ikuspegi globala eskaintzeko pentsatutako zikloa da; BBK Klima proiektuaren baitan jaio da.
