Olharanen lesioa tarteko, Erkiaga-Del Rio eta Johan-Zabala bikoteek jokatuko dute Gernikako Grand Slameko finala

Lehen erradiografiaren arabera Olharanek ez dauka hezurrik hautsita, hau albo batera utzi dute medikuek eta proba gehiago egin beharko dizkiote ea lotailuen haustura duen ala ez argitzeko.

Ainara Ruiz Urizar

Gernika-Lumo

2023/08/07

Zestaren katedrala berriro bete zen goraino Gernikako Grand Slameko finalerdiak ikusteko. Olharan eta Lekerika faborito argiak ziren Johan eta Zabalaren aurkako partidan (Johan, Baraindikaren ordezkoa izan da azken partidetan, honen lesioaren ondoren). Olharanek eta Lekerikak ez zuten arriskatu beharrik finaleko txartela lortzeko, joko segurua egiteagaz nahikoa zuten.

Partida 5-0 hasi zen gorrientzat eta bazirudien ez zela markagailua irauliko. Hala ere, 11-11 zihoazenean, Johan Sorozabalek albotik barrura errematatu zuen eta Olharanek, pilotaren bila korrika, eskuineko hanka hormaren kontra jarri zuen eta “krak bat entzun zuen orkatila baino 10 zentimetro gorago”. Urduritasuna nabari zen airean, eta katedrala isilik. Olharan erizaindegira lagundu behar izan zuten pilotariek.

Argazkia: Jai Alai News

Beraz, Olharan-Lekerika eta Johan-Zabala bikoteen partidako markagailuak 11-12 gelditu behar izan zuen, eta partida horrelaxe amaitu. Johan eta Zabala sailkatu ziren finalera, Erkiaga eta Del Rioren aurka aritzeko. Momentuko hipotesia baztertuta, lehen erradiografiaren arabera Olharanek ez dauka hezurrik hautsita eta proba gehiago egin beharko dizkiote ea lotailuen haustura duen ala ez argitzeko.

Erkiaga eta Del Riok pilota geldiarekin sufritu egiten dute, finalerdietan Goikoetxea eta Mantziren aurka gertatu zitzaien legez. Aurrera atera zuten lehen seta (13-15), baina kostatu egin zitzaien. Bigarrenean, pilota biziarekin, Erkiagak min gehiago egin zuen eta Del Riok eroso jokatu zuen (5-15). Goikoetxea eta Manzik lehen seta irabaztea zuten helburu, baina nahi izate horretan geratu zen. Bigarrenean ere, ezin izan zuten ezer egin.

Finalerako, Erkiaga eta Del Rio faborito argiak dira, baina Johan eta Zabalak aukera bat izan dezakete, oraindik aste luzea gelditzen da aurretik.