Gizon bat atxilotu dute Bermeon indarkeria matxista leporatuta
Bestalde, Iruñeko hilketa matxista salatzeko elkarretaratzeak deitu dituzte gaurko Gernika-Lumon.
Joan den eguaztenean Bermeoko Mugimendu Feministak egindako elkarretaratzea Segurtasun Sailak emandako informazioaren arabera, indarkeria matxista egotzita, gizonezko bat atxilotu zuten atzo goizean [uztailak 2] Bermeon. “09:00ak aldera, bikote bat eztabaidan eta elkar erasotzen zebilen Bermeoko Alde Zaharrean”, azaldu dute.
Jakitera eman dutenez, emakumea ospitalera eroan zuten “zauri txikiren bat artatzeko”. Ondoren, emakumea ertzain etxera joan zen, eta salaketa jarri zuen. “Emakumearen ustezko erasoak ere ikertzen ari direla” azaldu dute Segurtasun Sailetik.
Elkarretartzeak. Bestalde, barikuko Iruñeko hilketa matxista salatzeko elkarretaratzeak deitu dituzte gaurko; Gernikako Sare Feministak 19:30ean Merkurion batzeko hitzordua jarri du, eta Busturialdeko Itaiak, berriz, 20:00etarako deitu du elkarretaratzea, leku berean batuko dira.
