Uztaileko martitzenetarako proposamena dakar Gautegiz Arteagako Udalak
Argazkia: Gautegiz Arteagako Udala Ekintza kulturalak astearte iluntzeetan egitaraua aurkeztu du Gautegiz Arteagako Udalak. Patrik Saitua Gautegiz Arteagako alkateak azaldu duenez, kultur eskaintza horren bidez, “herriko udako arratsaldeak girotu” gura dituzte eta baita “dinamizazio soziokulturalean lagundu” ere.
“Badakigu udan geure aisialdiaz gozatzea gustatzen zaigula, oporretan egon ala ez. Programatu ditugun kultur jarduerek publiko guztientzako eskaintza zabalagaz entretenitzea daukate helburu, kultura ardatz hartuta. Gautegiz Arteaga eguna amaitzeko plan egokia izatea gura dugu”, azpimarratu du.
Datorren martitzenean (uztailak 4) hasiko dute ekintza kulturalen programa, Lur Uribarren mendizale elantxobetarrak bere Nepaleko bizipenak kontatuko ditu; argazkiekin eta bideokin lagunduta emango du hitzaldia, 20:30ean hasita, Aretxederreta Kultur Etxean. “Lur mendiko gidaria da eta Nepalen dauden munduko mendi garaienetara egindako hainbat espediziotan parte hartu du. Urte hauetan zehar, Asiako herrialde horretan espedizioetatik bizi diren pertsonen errealitatea ezagutu du. Eta bidaietan egindako argazki eta bideoen bidez, Lurrek bestelako errealidade bat erakutsiko du”. Era berean, espedizio handietan eta nepaldar herriarekiko elkarbizitzan sentitu dituen emozioak ere azalduko dituela zehaztu du.
Uztailaren 11n, berriz, Maria Vaquerizo artistak kontzertu akustikoa eskainiko du, 20:30etik aurrera, Kultur Etxearen ondoko plazan. “26 urteko kantautore lemoarrak aitortzen du musikak ezin duela hutsik egin bere bizitzan”. Euskarazko, gaztelaniazko eta ingelesezko abestiak sortzen ditu, pop, rock, country eta indie estilokoak.
Uztaileko martitzenetako kultur programazioagaz amaitzeko, hilaren 18an, film bat proiektatuko dute 22:00etan, parke berrian–Gazteluaren ondoan–. “Jende guztiarentzako proiekzioa izango da, familiak, gazteak eta adinekoak batzeko helburuagaz”.
Egutegia:
- Uztailak 4: Lur Uribarren elantxobetarraren Nepaleko bizipenak hitzaldia, 20:30ean, Aretxederreta Kultur Etxean.
- Uztailak 11: Maria Vaquerizoren kontzertu akustikoa, 20:30ean, Aretxederreta Kultur Etxearen ondoko plazan.
- Uztailak 18: Film proiekzioa, 22:00etan, parke berrian (Gazteluaren alboan).
