"Ezin hobeto" doa azoka solidarioa
Gaur arratsaldean eta bihar goizean azoka solidarioa zabalik egongo da Bekoportalen.
“Izugarri pozik” daude Bermeoko Minbiziaren Aurkako Elkarteko boluntarioak. Azoka solidarioa daukate jarrita Bekoportalen, eta “ezin hobeto” doala diote.
Mota askotakoak aurkitu daitezke bertan; jostailuak, liburuak, aterkiak, bitxiak, fularrak… denak Corte Inglesek emandakoak. “Gutxiengo akats” bat izateagatik eurek saldu ezin dituzten gauzak dira, eta 10 eurotan daukate garestiena. Arrakastarik handiena jostailuek daukatela diote boluntarioek; “gauza politak daude”.
Atzo arratsaldean zabaldu zituzten ateak, eta igiri orduko jendea zain zegoela azaldu dute. “Atzo arratsaldean mahaiak hutsik geratu ziren”, diote, eta “oso eskertuta” daude. Gaur eguerdian ere, jendea polito zebilen Bekoportaletik.
Oraindik ere aukera dago azoka solidariora bertaratzeko. Gaur arratsaldean 18:00etatik 20:00etara egongo dira, eta bihar, berriz, 12:00etatik 14:00etara.
