Urdaibaik iazko denboraldia hobetzea du asmo
"Izugarrizko taldea" daukatela esan du 'Bou Bizkaia'-ko entrenatzaileak zapatuan [maiatzak 27] Lameran egindako aurkezpenean.
Iaz irabazitako Kontxako Banderagaz eta ligako koroagaz agertu ziren Urdaibaiko arraunlariak zapatuan [maiatzak 27], Lameran; Bou Bizkaia ere ez zen falta izan taldearen aurkezpena egiteko.
Urdaibaiko arraunlariak ‘Bou Bizkaia’-gaz
Aurten ere Iker Zabala entrenatzailearen aginduetara lan egingo dute Urdaibaiko arraunlariek. Haren esanetan, “zaila” izango bada ere, iazko denboraldia hobetzea dute asmo: “Horrek esan gura du dena irabazi behar dugula, bigarrenari tarte handiagoa aterata. Badakigu ez dela erraza izango, herrian garaipenetara ohituta daude, urte asko daramatzagu puntan. Nahikoa ziur esan dezaket aurten ere puntan jarraituko dugula”.
Iker Zabala: “Denok batu behar gara. Gure kamisetek lelo bat daramate, herri bat talde bat, eta lelo horrek dioena da garrantzitsua. Izan ere, denok batera jarraitzen badugu olatu honek aurrera jarraituko du”
“Izugarrizko taldea” daukatela esan du Bou Bizkaiako entrenatzaileak. Taldea osatzen duten arraunlariek “potentzial handia” daukatela esan du Zabalak, eta “oso ondo” entrenatzen dabiltzala gaineratu du: “Ikusi besterik ez dago trainerilletan zein neguko estropadetan eduki ditugun emaitzak”. Hala eta guztiz ere, “garrantzitsuena eta politena” orain datorrela dio, eta uste du “denen artean” iazko emaitzak hobetzea lortuko dutela.
Taldean zenbait aldaketa egon dira. “Joan direnei nire zein klubaren aldetik eskerrak eman gura dizkiet iaz egindako denboraldiagatik, baina bakoitzak bere arrazoiak ditu taldea uzteko. Iaztik hona errepikatzen dugunen eta taldera etorri berri direnen artean, uste dut iazkoa baino talde politagoa daukagula”. Haren hitzetan, taldea orain “landu” egin behar da. “Ilusioagaz” daude, eta hori dagoen bitartean, “denak aurrera” irtengo duelakoan dago.
Zaleentzako mezua ere eduki du Zabalak: “Denok batu behar gara. Gure kamisetek lelo bat daramate, herri bat talde bat, eta lelo horrek dioena da garrantzitsua. Izan ere, denok batera jarraitzen badugu olatu honek aurrera jarraituko du”.
