Boloek eta bingoak ez dute hutsik egin Muruetako sanisidroetan
San Isidro egunez, tradizioari ondo eutsi diote muruetarrek eta mezaren eta hamaiketakoaren ostean, Bolo Txapelketa eta bingoa lehiatu dituzte gaur eguerdian [maiatzak 15], frontoian. Izan ere, plazan elkartu ordez, frontoiko estalpean egin dituzte bi lehiaketak.
55 parte-hartzaile egon dira Bolo Txapelketan, eta Ane Aberasturik irabazi du. 13:30ean hasi dute lehia, eta ume, gazte zein helduek erakutsi dute euren abilezia. Lehenengo bost sailkatuak saritu dituzte. 14:20etan hasita, berriz, bingoan aritu dira.
Arratsaldean, ostera, idi proben txanda izango da. Benguria (Almike) eta Lopategi (Billela) zein baino zein gehiago ariko dira, 18:00etatik aurrera.
Zapatu arratsaldean hasi zituzten San Isidro jaiak, eta gaur iluntzean, txokolatea janez borobilduko dituzte jaiak.
