Baratze baserri eskolan 76 bertsozale batuko dira Neguko bertso barnetegian
Neguko bertso barnetegia Gautegiz Arteagako Baratze baserri eskolan izango da asteburuan, eta 76 bertsozalek parte hartuko dute bertan, “inoiz baino gazte gehiagok“. Barikuan (otsailak 10) 17:30ean hasiko dute egonaldia, eta domekako 12:00ak aldera arte egongo dira bertan.
DBH 1.mailatik Batxilergoko 2.mailara arteko Bizkaiko bertsolari gazteentzako eskaintza da bertso barnetegia, eta horietako “asko” Busturialdekoak izango direla adierazi dute antolatzaileek, batez ere “bermeotarrak eta gernikarrak”.
Bizkaiko Bertsozale Elkartetik gogoratu dutenez, helburu nagusiak bertsoarekin gozatzeko aukera izateaz gain, Bizkaiko bertso eskoletan dabiltzan gazteek elkar ezagutzea eta beraien arteko harreman sarea sendotzea dira. “Eurentzako gune eta espazio bat sortu gura izan dugu, bertsoen bidez jolasteko”, adierazi dute antolatzaileek. Horrez gain, plazetan ikusten eta entzuten dituzten bertsolariekin esperientzia partekatzeko aukera izango dute bertaratzen direnek, Etxahun Lekuegaz esaterako, eta mendira irteerak ere egingo dituztela jakinarazi dute antolatzaileek.
Bertso udalekuak, udan. Bestalde, udan bertso udalekuak egingo dituztela ere aurreratu dute, eta horretan parte hartu nahi duten gaztetxoek martxoan izena eman beharko dute; informazio guztia Bertsozale Elkartearen webgunean argitaratuko dute laster.
Bertso udalekuetako hezitzaileen izen-ematea ere zabalik dago; begirale, zuzendari eta sukaldari lanetan aritu gura dutenek izena emateko aukera daukate datozen bi asteetan. Begirale praktikak egin nahi dituztenentzat ere zabalik dago deialdia. Astelehenean (otsailak 6) zabaldu da izen emateko aukera, eta otsailaren 20ra arte eman daiteke www.bertsozale.eus atarian.
Hautaketa prozesuko erabakiaren berri apirilaren amaieran emango diete izena eman dutenei, eta hezitzaileekin prestaketa saioa asteburu osokoa izango da: maiatzaren 12tik 13ra.
Bertso udalekuen datak. Amaiurren (uztailaren 8tik 17ra, aterpetxean ), Irañetan ( uztailaren 18tik 24ra, aterpetxean), Larraulen (uztailaren 25etik 31ra) eta Zuhatzan (uztailaren 24tik 28ra) izango dira aurtengo udako egonaldiak. Txanda guztiak uztailean izango dira eta nahi duenak, txanda batean baino gehiagotan parte hartu dezakeela zehaztu dute.
