Hegaztiak aztergai, Euskal Herria Museoan eta Ekoetxea Urdaibain
‘Parkeko hegaztiak’ familia tailerra eskainiko dute asteburuan Euskal Herria Museoan, eta hegaztiak behatzeko hastapen tailerra, Ekoetxea Urdaibain.
Argazkia: Ekoetxea Urdaibai. Hegaztiekin lotutako tailerrak emango dituzte asteburuan Busturiko Ekoetxea Urdaibain eta Gernika-Lumoko Euskal Herria Museoan.
SEO Birdlifen eskutik, hegaztien ezagutza eta behaketan murgiltzeko tailerra emango dute zapatuan (urtarrilak 20), 10:00etatik 13:00etara, Ekoetxea Urdaibain, doan. Irteeran hezeguneak ezagutzeko eta hegaztiak behatzeko oinarrizko formazioa emango dute. Hegaztiak non ikusten diren azaldu, eta horiek ondo ikusteko beharrezko tresnak eta identikatzeko moduak emango dituzte.
Parte hartzeko www.ekoetxea.eus webgunean aurretiaz izena eman behar da; 6 urtetik gorakoek parte hartu dezakete.
Euskal Herria Museoko Parkeko hegaztiak familia tailerra zapatuan 16:30ean eta domekan 11:30ean eskainiko dute doan.
Museoko lorategian egoten diren txoriez jardungo dira, «asko baitira eta hainbat espezietakoak gainera». Ondoren, txorientzako etxeak egiten ikasiko dute.
Erreserba egiteko zein informazio gehiagorako euskalherriamuseoa@bizkaia.eus helbidera idatzi edo 94-625 5451 telefono zenbakira deitu behar da.
