Ez ahaztu eskarmentua

Diego Beaskoetxea eta Imanol Lopez beteranoek 2-1eko markagailuagaz irabazi diote Johan Sorozabal eta Julen Del Rio gazteei. Garaipen horregaz, B multzoko lidertzan ipini dira gernika-lumotarra eta zumaiarra. Txapelketaren erdia egin dute jadanik.

Alex Uriarte Atxikallende

Gernika-Lumo

2022/12/20

Beteranoek gazteen ekinari eutsi gura diote. Diego Beaskoetxea gernika-lumotarrak eta Imanol Lopez zumaiarrak Johan Sorozabal miarriztarrari eta Julen Del Rio gasteiztarrari irabazi zieten atzo, Jai Alai Winter Seriesen. Gernika-Lumoko Jai Alai katedralera bertaratu ziren 1.526 ikusleek goi-mailako zesta-puntaz gozatzeko aukera paregabea eduki zuten, lehiaketaren ekuatorean. Sorozabalek eta Del Riok, behin hasierako urduritasuna gaindituta, partidua beren eskuetan izan zuten, eta ozta-ozta galdu zuten Beaskoetxea eta Lopezen aurka.

Argazkia: Andoni Iparragirre/Guk Jai Alai.

Garaipenetik hurre geratu arren, sentsazio bikainak utzi zituzten datozen partiduei begira. Izan ere, Beaskoetxea eta Lopez B multzoko lidertzan ipini dira, zazpi puntugaz; Sorozabalek eta Del Riok eta Iñaki Osa Goikoetxeak eta Nicolas Etxetok launa puntu dituzte, baina partidu bat jokatzeke daukate oraindik. Atzoko galtzaileek 2-0 irabazi beharko diote Goikori eta Etxetori, sailkatuko baldin badira. Ogibide gaitza dirudien arren, atzo erakutsitako maila aintzat izanda, edozer da posible.

Partidua berdintasunagaz hasi zen arren, 2-2koagaz hautagai nagusiek maila bat igo zuten erritmoa; Lopezek norgehiagokaren ardura beregain hartu zuen, atzealdetik errebeskadak eginez. 6-2ko markagailuaren ondoren, Del Rioren eskumakadek aldeak murriztu zituzten, eta 8-5ekoagaz egin zuten lehendabiziko atsedenaldia. Sorozabalen ausardia begibistakoa zen, eta tarteka-marteka estu hartu zuen Gernika-Lumoko aurrelaria. Beaskoetxea, baina, ez zen kikildu, eta eraginkortasunez erantzun zien Del Rioren eskumazko jaurtiketei. Beteranoek akats gutxiko jokoa erakutsi zuten, ziurtasunez beterikoa, eta 15-10 irabazi zuten lehenengo seta.

Bigarrenaren hasierak, ostera, aldaketa erakutsi zuen: Sorozabalek aurrealdeko koadroak gehiago dominatu zituen, eta, gainera, hamarreko markaraino ere atzeratu zen, jokaldiak txik-txakez edota errematez borobiltzeko. Era berean, pilota biziagoak mesede egin zion bere bikote Del Riori ere; gehiago zukutu ahal izan zituen eskumazko jaurtiketak, eta ez zien ihes egiten utzi Beaskoetxeari eta Lopezi: 1-1, 2-2, 3-3, 4-4, 5-5 eta 6-6 berdindu zuten. Markagailuak islatu ez arren, Lopezek nagusitasuna erakutsi zuen jokoan, bere boteprontoekin.

Argazkia: Andoni Iparragirre/Guk Jai Alai.

Berdinketa haustera. Aurrelariek, beren aldetik, hainbat jokaldi egin zizkioten elkarri. Bigarren seta gako zen bi bikoteentzat. Setaren erditik aurrera, urdinek beste martxa bat sartu zuten, eta 8-10eraino egin zuten ihes. Lopezek Sorozabalen dejada bat errematatu zuten, eta bikote urdinak Zalantzen Txokoa eskatu zuen. Errepikapenak argitu zuen Lopezen pilota kanpora atera zela. Egoera horrek mentalki emandako bultzadagaz, Sorozabal eroso agertu zen azken tantoetan, eta Del Riok babes handia eman zion. 9-15ekoagaz, tentsioa nabaria zen. Berdinketa haustean erabakiko zen partidua.

Hirugarren setak borroka itxura eduki zuen. Erasoaldiak joan, erasoaldiak etorri, 2-4ra iritsi ziren Sorozabal eta Del Rio; une hartan, Beaskoetxea eta Lopez txapelketatik kanpo zeuden. Baina eskarmentua jokoan sartu zen: urdinek hiru match-ball zituzten, eta gorriek hiruak libratu behar zituzten. Gazteek ez zuten akats handirik egin, baina gorriak nagusi agertu ziren, eta, tantoz tanto, 4-4koa lortu zuten. Sorozabalek ezin izan zion airez erantzun Beaskoetxearen sakeari, eta 5-4 galdu zuten partidua urdinek. Gaur-gaurkoz, Beaskoetxea eta Lopez B multzoko hautagaiak dira, txapelketa hasieran asko sufritu zuten arren. Eskarmentua inoiz ahaztu ezin daitekeen faktorea da.