Gerekizen landaketa egiteko hitzordua ipini du Lurgaiak
Lurgaia Fundazioaren helburua da biodibertsitatearen kontserbazioa eta natura-ondarearen kudeaketa sustatzea: espezieak, habitatak, lotutako prozesu ekologikoak eta paisaia. Horrela, Urdaibaiko basoen azalera handitzeko zereginari eusten dio eta aste honetan Gerekizera joango dira. “Beti bezala, plana guztion onerako lan eginez landatzea eta gozatzea da”, adierazi dute.
Zapatuan (azaroak 12) 09:00etan elkartzeko deia egin dute, Gerekizeko aterpetxearen alboan, eta handik joango dira landaketa egitera. Amaitutakoan hamaiketakoa jango dutela jakinarazi dute.
Parte hartzeko interesa daukatenek aurretiaz izena eman behar dute, info@lurgaia.org helbide elektronikora mezua bidalita. Eguena (azaroak 10) baino lehen izena eman behar da.
Bertaratzeko asmoa daukatenentzat ohiko gomendioak gogorarazi dituzte; eguraldiaren aurreikuspenaren arabera, mendiko edota uretarako oinetako eta arropa aproposak eroateko esan dute, bai eta ura eta gura duenak jateko zerbait ere.
