Komunitate Energetikoa sortzeko lehen urratsak egiten dabiltza Ean, Natxituan eta Bedaronan
Energie izenpean, Ean, Bedaronan eta Natxituan komunitate energetikoa sortzeko prozesua abiatu dute. Gaur, barikuan eta zapatuan egitasmoaren aurkezpen hitzaldiak egingo dituzte.
Eak, Bedaronak eta Natxituak bat egin dute energia komunitatea sortzeko asmoagaz, eta proiektuaren norakoak herritarrei azalduko dizkiete aste honetan. Hain zuzen ere, gaur, barikuan eta zapatuan aurkezpen hitzaldiak egingo dituzte hiru tokietan. Energie izenagaz, larrialdi klimatikoari, prezioen igoera orokorrari eta baliabide materialen agortzeari tokiko erantzuna emateko ideiagaz jaio da ekimena, Eako Udaletik azaldu dutenaren arabera. Komunitatearen jomuga nagusia energia garbi eta berriztagarria lortzea izango da, lekuko baliabideez hornituta. Horretarako dinamika ere argi utzi dute proiektuaren sustatzaileek: herritarren arteko auzolana.
Ea karbono neutroa egitasmoaren barruan sortu da energia komunitatearen proiektua. Herri kooperatiba sortzearen ideia, azaldu dutenez, “irabazi asmorik gabekoa eta tokiko energiaren autokontsumora bideraturikoa” izango da. Sorrera bidean, Enaden Begiak elkartea eta Goiener energia berriztagarrien sorkuntza eta erosle kooperatiba dituzte bidelagun, “herritarren bultzadaz gain”. Hain zuzen ere, argitu dute energia iturburu den instalaziotik 500 metrora bizi den edonor izan daitekeela kooperatibako bazkide kontsumitzaile; bazkide laguntzaile, ostera, edonor izan daiteke, inongo baldintza barik.
Bazkide bila. Gaur-gaurkoz, antolatzaileek lehendabizi eman behar duten urratsa bazkide kopuru mardultzea da; jarraian sortu eta onartuko dituzte kooperatibako estatutuak, eta sortuko dute lantalde errektorea. Orduantxe eman ahalko da altan, kooperatibaren ekoizpena abian ipinitzeko. Bazkide izateko prezioa 50 euro ordaindu beharko dituzte, eta datuak betetzeko dokumentua bete. Txosten horretan izen-deiturak, NAN zenbakia, telefono zenbakia eta helbide elektronikoa apuntatu beharko dituzte. Dokumentu hori aste honetan egingo dituzte aurkezpen berbaldietan aurkeztu ahalko dituzte.
Energie, Natxitua, Bedarona eta Eako komunitate energetikoaren aurkezpen saioak:
- Azaroak 2 (eguaztena) 18:00etan, Natxituko Bolatokian.
- Azaroak 4 (barikua), 18:30ean, Bedaronako txokoan.
- Azaroak 5 (zapatua), 11:00etan, Eskolondon.
