Ukrainako gerran hildako kazetariak gogoratu dituzte George Steerren omenaldian

Steer omentzeaz gain, Ukrainako gerran zauritutako kazetari guztiei eta prentsa-zentsuraren eta adierazpen-askatasunaren biktima izan diren komunikabideei ere omenaldia egin diete.

Ane Maruri Aransolo

Gernika-Lumo

2022/04/27

George Steer kazetaria omendu dute gaur, Gernikan gertatutakoa munduan zabaltzeagatik. Bere monolito aurrean aurreskua dantzatu eta lore eskaintza egin diote, eta kazetariak The Times eta The New York Times egunkarietan egindako gertakarien kronika zehatza balioetsi dute: “Funtsezkoa izan zen herri honetan gertatutakoaren egia zabaltzeko”.

Horrez gainera, Ukrainako gerran hildako kazetariak izan dituzte gogoan. “Omenaldi bat egin gura diet Ukrainako gerraren berri ematen hil diren kazetari eta kazetari grafiko guztiei”, azaldu du Jose Mari Gorroño Gernikako alkateak. Besteren artean, Oksana Baulina errusiar kazetaria, Oleksandra Kuvshynova ukrainarra eta Brent Renaud estatubatuarra izan ditu gogoan.

Gerra horretan zauritutako kazetari guztiei eta prentsa-zentsuraren eta adierazpen-askatasunaren biktima izan diren komunikabideei ere omenaldia egin diete Steerren monolitoaren aurrean. “Gertaera horiek prentsa-askatasunaren aurkako eraso oso larriak dira”, azaldu du Gorroñok.

Steerren semeak bidalitako gutuna irakurri du gaurko ekitaldian Xabier Irujo historialariak: “2019an Gernika izan nintzen azken aldian, George Steer Saria eman nion Mikel Aiestaran gerra kazetariari. Mikel Ukrainan izan da bonbardaketen eta errefuxiatuen ihesaren berri ematen, nire aitak duela 85 urte Euskal Herrian egin zuen modura. Beraz, tradizio noble eta arriskutsuak aurrera segitzen du. Ohore guztia egia esaten duten kazetari ausart horiei, eguneroko historialariak dira, Steerrek idatzi zuen modura. Etor daitezela bakea eta justizia laister”.

Egia.
Alkateak adierazi du “garrantzia handia” duela herritarrak ondo informatzeak, eta Steerrek “egiaren” alde egin zuen lana balioan jarri du: “Ikusitakoa transmititu zuen munduan. Gerretan lehenengo biktima izaten da egia, baina hori ez zen Gernikaren kasua izan Steerren lanari esker”. Kazetariak izan zuen ausardia eskertu dio alkateak, biktimen, bizirik atera direnen eta herri osoaren izenean: “Egia esatean egitateen egia ezkutatu nahi zuten beste bertsioen kontra egin zuen”.