Beatriz Artolazabal: "Estatu Espainiarren onarpenak erantzukizuna eta autokritika izan beharko lituzke"

Jose Mari Gorroño Gernika-Lumoko alkatearentzat pauso "garrantzitsua" izan da Espainako Gobernuaren adierazpena, baina beste pauso bat eman behar dela dio.

2022/04/27

Ane Maruri Aransolo

Espainiako Gobernuak lehenengoz gaitzetsi zuen atzo Gernikako bonbardaketa, 85. urteurrenean, baina ez zuen barkamenik eskatu. Beatriz Artolazabal Berdintasun, Justizia eta Gizarte Politiketako sailburuak adierazi du atzoko Espainiako Gobernuaren adierazpena “esanguratsua” izan zela: “Ministro Kontseiluak Gernikako bonbardaketari buruz onartutako adierazpen instituzionala norabide egokian emandako urrats txiki baina esanguratsua da. Lehen pauso hau oroimenaren, egiaren eta konpromisozko bide baten hasiera izan behar da”.

Sailburuak gaineratu zuen Estatu Espainiarren onarpenak “erantzukizuna eta autokritika” beharko lituzkeela. “Memoria eta egia bakearekiko konpromiso zibikoaren zerbitzura jarri behar dira. Oroimena eta egia behar dira kontzientzia aldatzeko, askatasunaren eta demokraziaren balioekin konprometitutako herritarrak bihurtzeko”, adierazi zuen.

Gainera, egia jakiteko eskubidea aldarrikatu zuen: “Urte askoan, albiste faltsuen jomuga izan da Gernika, faxisten interesen eta erregimen diktatorialen zerbitzura. Bonben ondoren, gezurrak erori ziren Gernikara, baina, George Steer, Agirre, Picasso, eta gernikarrek eurek, egiarekin gainditu zituzten albiste faltsu horiek. Hala jakin zen Gernikari buruzko egia”. Sentsibilizazio lan horretan “garrantzi eta esanahi berezi”a hartzen dutela oroimenerako espazioek adierazi du: “Gernika ez da iragana, oroimen bizia da, guztion artean eraikitzen jarraitu beharreko memoria. Ikerketa berriak behar dituen memoria”.

Jose Mari Gorroño Gernika-Lumoko alkatearentzat pauso “garrantzitsua” izan da Espainako Gobernuaren adierazpena, baina beste pauso bat eman behar dela dio.

Gorroñok jakinarazi du martxoaren 11n Pedro Sanchez Espainiako presidenteari gutun bat bidali ziola errekonozimendua eta parkamen eskaera “erreparazio neurri sinbolikoak” direla esanez. Eskatu zion aitorpen publiko bat egiteko, “biktimen oroimena balioan jartzeko, memoria historioa berreraikitzeko eta gertatutakoaren egia aldarrikatzeko”.

“Udaletik Espainiako Gobernuari eskatu genion onar dezala frankismoaren erantzukizuna gure herriaren bonbardeaketan. 1997an, Alemaniako orduko presidenteak bere gain hartu zuen Condor legioaren aire-erasoaren erantzukizuna. Berak aitortu zuen hegazkin alemaniarren errua eta barkamena eskatu zuen”, azaldu du.

Gainera, adierazi du Gernikan 1937an izandako gertaerak ez dagozkiola soilik bonbardaketa jasan zituen herriari: “Gertakari horiek memoria kolektiboaren parte dira. Balio horietan oinarritutako adierazpen batek oinarrizko bi printzipio sustatuko lituzke: pertsonaren eskubideen errespetu osoa eta gure iraganaren egia ezagutzeko eta zaintzeko eskubidea. Gobernuari eskatzen diogu adierazpen ofizial bat egin dezala, gertaerak gertatu ziren bezala aitortuz”.

Pedro Sanchezek, bere aldetik, atzo erantzun zion, eta alkateari onartu zion 1937ko apirilaren 26an Gernikak sufritutako bonbardaketa ezin dela ahaztu ez Espainian, ez Europan: “Gerra zibileko sarraski okerrenetako bat izan zen. Sarraskia kontu handiz planifikatu eta disenatu zuten izua eragiteko, defentsarik gabeko herri batean”.

Erlazionatutako edukiaEspainiako Gobernuak lehenengoz “gaitzetsi” du Gernikako bonbardaketa EAJk ontzat jo du Espainiako Gobernuak Gernikako bonbardaketa gaitzetsi izana