Bueltan datoz sanandresak

Iaz pandemiagatik ospakizunik egin ez bazuten ere, aurten, "zuhurtziaz" ospatuko dituzte San Andres jaiak Ibarrangelun eta Sukarrietan

Aintzina Monasterio Maguregi

Ibarrangelu,Sukarrieta

2021/11/25

Egoerak behartuta “zuhurtziaz” jokatzeko ardura badute ere, iaz ospatu ez zituzten sanandresak bueltatuko dira Ibarrangelura eta Sukarrietara. Ohi baino egitarau “xumeagoak” antolatu dituzte.

Ibarrangelun, santuaren egunean meza eta hamaiketakoa ez dira faltako, eta gaiteroen laguntzagaz berotuko eta girotuko dute eguerdi partea.

Zapatuan, berriz, EinGO taldeko musikariekin girotuko dute iluntzeko poteoa. Hala ere, eguerdian hasiko dira jai giroan murgiltzen. Tortilla Txapelketa antolatu dute aurten, eta parte hartu gura dutenek aldez aurretik izena eman behar dute Kultur Etxean edo Batzokian.

Ibarrangelutarrek San Andres jaiak eta Euskararen Eguna alkarregaz ospatzen dituzte. Hain zuzen, urtero Euskararen Egunaren hurrengo domekan egin ohi dituzte ospakizunak. 11:00etako mezaren ostean, herriko dantzarien emanaldiaz gozatuko dute plazan. Hala, Lorea dantza taldekoak euren plazarik eta hitzordurik kuttunenera bueltatuko dira aurten. Jarraian, tradizioa mantenduz, udalerriko jaioberriei opariak banatuko dizkiete; iaz ez zutenez jairik egin, azken bi urteetan jaiotakoei emango dizkietela jakinarazi dute. Ondoren, Euskararen Eguneko adierazpena irakurriko dute.

Sukarrietan, santuaren egunean bertan, meza eta monjorra izango dituzte, musikagaz girotuta.

EGITARAUAK

Ibarrangelu
Azaroak 30, martitzena, San Andres Eguna.
– 12:00. Meza, San Andres elizan.
– 12:00. Hamaiketakoa tabernetan eta gaiteroak kalejiran.
Abenduak 4, zapatua.
– 12:30. Tortilla Txapelketaren
hasiera.
– 13:30. Tortillen aurkezpena. Txapelketan parte hartzeko aurretiaz izena eman behar da Kultur Etxean edo Batzokian.
– 21:00. EinGO, tabernarik taberna.
Abenduak 5, domeka.
– 11:30. Ibarrangeluko Lorea dantza taldearen ekitaldia, udaletxe aurrean.
– Jarraian, jaioberriei opari banaketak (azken bi urteetan jaiotakoei emango dizkiete) eta Euskararen Eguneko adierazpena irakurriko dute.

Sukarrieta
Azaroak 30, martitzena, San Andres Eguna.
Sukarrietako Kantaguneak girotuko du goiza.
– 12:00. meza nagusia, Mundakako Abesbatzagaz.
– 13:00. Monjorra, Plazatxo tabernan.