Kontzertuz betetako agurra ikasturteari
SOMEko III. Kultur Astea martxan dago. Barikuan hasi eta ekainaren 22ra bitartean udalerriko txokoak zein sare sozialak musikaz beteko dituzte Segundo Olaeta Musika Eskolako ikasleek.
Segundo Olaeta Musika Eskolako ikasturteko III. Kultur Astea martxan dago, eta ikasleek hartu dute dagoenerako protagonismoa. Ekainaren 22ra bitartean, udalerriko hainbat txoko musikatuko dituzte.
17 kontzertu prestatu dituzte, aurrez aurrekoak zein streaming bidezkoak. Emanaldietarako ohikoak diren Lizeo Antzokian eta Elai-Alai aretoan jotzeaz gain, sare sozialak ere ikasleen agertoki izango dira. Izan ere, Segundo Olaeta Musika Eskolaren instagram kontuan entzun eta ikusi ahalko dira emanaldiak.
Gaur, 19:30ean Lizeo Antzokian, jendaurrean emango dute kontzertua fanfarriako, txistu taldeko eta banda gazteko ikasleek. Eta bihar, trikitixa ikasleen musika ikuskizuna egongo da Elai Alai aretoan, 18:00etan. Musika hitzorduek eguenean 18:00etan jarraituko dute piano kontzertuekin Elai Alai aretoan, eta barikuan biolinak ariko dira leku eta ordu berean. Barikuan bandakoek Musika Eskolako terrazan joko dute 19:15ean, eta Konboek Lizeo Antzokian 20:00etan. Martitzenean, 18:00etatik aurrera, haize-metal, klarinete eta saxo emanaldiekin amaiera emango zaie aurrez aurreko musika saioei Elai Alai aretoan. Aurrez aurreko kontzertuetara joateko gonbidapenak beharko dira.
Bestalde, streaming bidezko entzunaldiak ekainaren 15ean, 16an eta 21ean egingo dituzte. Lehenengo egunean pianoa lau eskutara joko dute. 16an, 17:00etan, zuzeneko bat eskainiko dute instagram kontuan txelo eta piano emanaldiekin, eta bertan parte hartuko dute, baita ere, txeloen taldeak, orkestrak eta ganbara taldeak. Astelehenean, hari eta haize instrumentuekin osatutako taldeak ere zuzeneko kontzertua eskainiko du.
Egitaraua:
Gaur, ekainak 15.
19:30ean, Lizeo Antzokian, fanfarriaren, txistu ikasleen eta banda gaztearen kontzertua. Gonbidapena behar da emanaldia ikusteko.
Bihar, ekainak 16.
18:00etan eta 18:45ean Elai Alai aretoan trikitixa ikasleen emanaldiak. Bi saio antolatu dituzte, eta gonbidapena behar da horiek ikusteko.
Etzi, ekainak 17.
18:00etan eta 19:00etan Elai Alai aretoan piano ikasleen saioak. Gonbidapenak behar dira emanaldi biak ikusteko.
Ekainak 18, barikua.
18:00etan, Elai Alai aretoan, biolin ikasleen emanaldia jendaurrean. Gonbidapena behar da ikusteko.
19:15ean, Musika Eskolako terrazan, Banda Sinfonikoaren kontzertua jendaurrean. Gonbidapena behar da ikusteko.
20:00etan, Lizeo Antzokian, Konboen kontzertua jendaurrean. Gonbidapena behar da kontzertua ikusteko.
Ekainak 21, astelehena.
19:30ean orkestraren emanaldia SOMeko @segundoolaeta Instagram kontuan.
Ekainak 22, martitzena.
18:00etan, Elai Alai aretoan, Haize metal ikasleen emanaldia. Gonbidapena behar da kontzertua ikusteko.
19:30ean, Elai Alai aretoan, klarinete ikasleen emanaldia. Gonbidapena behar da kontzertua ikusteko.
