Ekaitz Martin eta Unax Muniozguren urruzunotarren sarera gehitu dira

Batxilergo eta Erdi Mailako Heziketa Zikloko kategorian saritu dute Martin, eta DBH 3 eta 4. mailako ikasleen artean jaso du saria Muniozgurenek.

Ane Maruri Aransolo

Gernika-Lumo

2021/05/26

Euskaraz idazteko zaletasuna gazteen artean sustatzeko sortutako Urruzunotarrak gehituz literatur lehiaketaren saridunak ezagutarazi dituzte. Eta, beste behin, sarituen artean daude eskualdeotako ikasleak. Gernika BHIko Ekaitz Martin Perez eta Unax Muniozguren Alonso izan dira sarituak, eta, horrenbestez, urruzunotarren zerrendara batu dira.

Lehiaketan Bizkai, Araba eta Gipuzkoako eta Nafarroako ikasleek parte hartzen dute, bi kategoria desberdinetan banatuta: prosan eta poesian. Hain zuzen, prosan saritu dituzte bi ikasleak.

Batxilergo eta Erdi Mailako Heziketa Zikloko kategorian saritu dute Martin, Boterearen dantza amaigabea izeneko lanagatik. DBH 3 eta 4. mailako ikasleen artean, berriz, Muniozgurenek jaso du saria, Ilargiaren eskuetan idazlanagatik.

Institutuarentzat “oso pozgarria” da ikasleek euren idazteko gaitasunengatik sariak lortzea.

Gernikako institutuko ikasleek, sari modura, bost eguneko literatura-egonaldia egingo dute. Bertan, saridun guztiek literatur-tailerrak eta bestelako ekintzak egingo dituzte, hainbat euskal artista gertu-gertutik ezagutuko dituzte, baita Euskal Herriko zenbait leku ere. Horrez gain, diploma jasoko dute eta euren lanak Sagastiberri izeneko bilduman argitaratuko dira.

Betiko legez, literatur munduko izen ezagunek osatu dute epaimahaia. Hain zuzen, Gari Berasaluzek, Peru Iparragirrek, Goiatz Labandibarrek, Jasone Osorok eta Patxi Zubizarretak izan dute ikasleen lanak aztertzearen ardura.