Zahartze aktiboa sustatzeko ildo estrategiko berri bat zabaldu du Gernika-Lumoko Udalak

Zehaztu dutenez, nagusien ekonomian sakontzeak aukera ematen du adineko pertsonen gaitasuna onartzeko, herriaren garapen ekonomikoa bultzatzeko, tokiko enplegua sortzeko eta pentsamendu ekintzailea indartzeko.

Ane Maruri Aransolo

Gernika-Lumo

2021/04/22

Gernika-Lumoko Udalak Lanbide Ekimenak Zentroaren bitartez, zahartze aktiboa herriko mapetan txertatzeko helburua duen Silver Economy Rural izeneko proiektuan parte hartu du; tokiko garapenean adituak diren erakundeen sarearen parte da proiektua.

Gernika hiri-ingurune integratzaile eta irisgarri bihurtzeko Plan Estrategikoaren barruan sartu du udalak jarduera, zahartze aktiboa sustatzea helburu hartuta. Adituek adierazi dutenez, nagusien ekonomian sakontzeak aukera ematen du adineko pertsonen gaitasuna onartzeko, herriaren garapen ekonomikoa bultzatzeko, tokiko enplegua sortzeko eta pentsamendu ekintzailea indartzeko. Hori horrela, aukera guzti horiek jorratzeko ildo estrategiko berri bat irekiko du Gernika-Lumoko Udalak.

Jon Lejarraga Lanbide Ekimenak elkarteko presidenteak zehaztu duenez, adinekoak gero eta kolektibo handiagoa dira, arlo desberdinetan asmo zein premia handiak dituztenak: “Zahartzearen errealitate eta erronka horiek, aldi berean, aukera paregabea izan daitezke udalerriarentzat, bai sektore horri eszenatoki ahalik eta onena eskaintzeko, zein euren bizi kalitate eta beharrak asetzeko ezaugarri egokiak bilatzeko ere”.

Hain zuzen, proiektuaren barruan kokatutako Bizi luzearen aukerak landa ingurunerako onlineko hitzaldian parte hartu zuen Lanbide Ekimenak elkarteak, eta adinekoen ekonomia aztertu zuten bertan. Zehaztu dutenez, nagusien ahalmena ezagutarazteko hitzaldia izan zen, baita landa eremuko lurraldearen dinamizazioan lan egiten hasteko ere. Izan ere, 100 elkarte baino gehiago biltzen dituen sare bat ehuntzen hasi ziren. Bilera horretan parte hartu zutenak bihar batuko dira berriro, “lanean jarraitzeko eta sinergiak ehuntzeko”.

Proiektuaren hasiera. Tokiko garapenean adituak diren erakundeen sareak 2020an sortu zuen proiektua, adineko pertsonen ekonomia landa ingurunea suspertzeko agendan sartzeko asmoz. Proiektuan erakunde sarearen parte diren bederatzi erakundek hartzen dute parte: Sodebur (Burgosko Diputazioa), Divalterra (Valentziako Diputazioa), Tarragonako Diputazioa, Nasuvinsa, Medina del Campoko Udala, Iraurgi Berritzen, Lanbide Ekimenak, Tolosaldea Garatzen eta Segoviako Udala. Jakinarazi dutenez, proiektuak Plataforma50 Hacking Longevity aholkularitza-enpresaren laguntza estrategikoa du.