Lau ikastarotan parte hartzeko aukera dago Gaztelekuan
Ikastaroak 10:00etatik 13:00etara bitartean izango dira, bi txandatan. Ikastaroetan parte hartzeko, baina, aurretiaz izena eman beharko da.
Abenduaren 5etik 27ra bitartean, lau ikastarotan parte hartzeko aukera dago Gernika-Lumoko Gaztelekuan. Irudiak eta bideoak editatzen ikasteko aukera egongo da, eta irudi bektorialekin lan egiteko Inkscape programaren nondik norakoak ere landuko dituzte. Halaber, eLiburutegiari buruzko ikastaroa egongo da aukeran.
Saioak 10-15 urte arteko gaztetxoei zuzenduta daude, eLiburutegiari buruzkoa salbu; ikastaro hori 10 urtetik gorakoentzat izango da, adin mugarik barik.
Ikastaroak 10:00etatik 13:00etara bitartean izango dira, bi txandatan; egun bakoitzean txanda bakarra egingo dute. Ikastaroetan parte hartzeko, baina, aurretiaz izena eman beharko da gaztelekukoikastaroak.blogspot.com webgunean edota Gaztelekuan bertan. Antolatzaileek jakinarazi dutenez, txanda bakoitzeko sei leku eskainiko dituzte, eta horien egokitzapena izen-ematearen araberakoa izango da.
Lehenengo ikastaroa asteburu honetan emango dute; zapatuan eta domekan. Gimp irudiak editatzeko programaren hastapen ikastaroa eskainiko dute hain zuzen. Bertan, editore grafikoa ezagutu eta oinarrizko funtzioak zelan erabil daitezkeen ikasiko dute bertaratzen direnek.
Abenduaren 7an eta 8an, berriz, bideoak editatzen ikasiko dute bertaratzen direnek. Final Cut eta Adobe Premiere programak izango dituzte aztergai: “Denbora lerroa ezagutu eta ohiko programaren oinarrizko funtzioak ikusiko ditugu”.
Irudi bektorialekin zelan lan egin ikasteko, Inkscape programa erabiliko dute abenduaren 12an eta 13an. Programa ezagutu eta oinarrizko funtzioetan sakonduko dute.
eLiburutegiari buruzko ikastaroa, berriz, abenduaren 26an eta 27an izango da. Plataforma ezagutu, eta gailuen konfigurazioaz eta erabileraz ariko dira. Zehaztu dutenez, ikastaroa helduei eskaintzeko aukera ere egongo da.
