Malosten menderaezin segitzen du Lointek Gernika Bizkaiak
Lointek Gernika Bizkaiak 80-55 irabazi dio Quesos El Pastor Zamarati, ligaren 8. jardunaldian.
Argazkia: Lointek Gernika Bizkaia. Ligaren 8. jardunaldietan bost garaipen daramatza Lointek Gernika Bizkaiak, eta etxeko partidu guztiak irabazi ditu. Bart 80-55 nagusitu zitzaion Quesos El Pastor Zamarati, Malosten.
Zamorako taldea sailkapenaren behekaldean, puntuen beharrean dago, eta ideiak argi kantxaratu zen. Etxeko taldea, berriz, bere erritmoa eta jokoa topatu ezinik egon zen. Errebotean kontrola eduki barik, partiduan erabat sartu ezinik ibili ziren Lointekekoak. Hamazazpina bukatu zuten lehen laurdena. Angie Bjorklundek argi izpi apur bat eman zion etxeko taldeari, eta Nogaye Lo ere saiatu zen. Baina, haren jokaldiak bakarrik ez ziren nahikoa. Minutuek aurrera egin ahala, bere nortasuna erakusteko gai izan zen Lointek. Zamarat ere bizi zegoen, baina zazpi puntuko abantailagaz heldu ziren atsedenaldira Lointekekoak (36-29).
Partidua amaituta Mario Lopez entrenatzaile gernikarrak esan modura, lehen zatian defentsan asko sufritu zuten, eta aurkariek huts egiteak egin zituztelako heldu ziren aurretik markagailuan atsedenaldira.”Lehen bi laurdenetan nahaste asko eduki ditugu defentsan, eta atzean intentsitate gutxigaz jokatu dugu”. Erasoan lan ona egin arren, gura luketen moduan aritu ez izana aitatu zuen: “Momentu askotan, jaurtiketetan erabaki okerrak hartu ditu. Atsedenalditik bueltan, defentsan asko hobetu dugu, eta horrek erasoan bestelako abiaduragaz jokatzea ekarri digu”.
Hirugarren laurdenean bere indarra atera zuen Lointek Gernika Bizkaiak. Jokoan distira handirik barik, baina defentsan sendo arituta, eta baloia ondo mugituz errenta handitzea lortu zuen. Gainera, aurkariek baloi asko galtzea eragin zuten, eta aurkariei indarra falta zitzaiela igartzen zen. Hala, 20 puntuko aldeagaz (62-42) sartu ziren azken laurdenera. 26-13ko partzialagaz partidua erabakita zegoela sumatzen zen. Defentsa lanean ahaleginak jarrita ahalegindu zen Zamorako taldea, baina beranduegi zen.
Zapatuan, Salamancan. Hurrengo jardunaldian, talde gernikarrak aurkari gogorra izango du aurrean. Perfumerias Avenida liderraren kantxa bisitatuko du (19:00), zapatuan [urriak 31]. Salamancako taldeak ez du partidurik galdu orain arte.
