Asier Galarza eta Koldo Gezuraga garaile, Lekeition eta Orozkon

Bizkaiko Bertsolari Txapelketako lehenengo bi sailkapen saioak ospatu dira, eta bietan gailendu dira Busturialdeko bertsolariak. Gaur Busturian eta Getxon jokatuko dira hurrengo bi saioak.

Ane Maruri Aransolo

Busturialdea

2020/09/17

Hasi da Bizkaiko Txapelketarako sailkapen fasea. Udabarria Bertsotan faseko lehen bi saioak jokatuta, Asier Galarza Garai muxikarra eta Koldo Gezuraga Seijido gernikarra dira lehenengo irabazleak.

Lekeitioko Azkue aretoan eta Orozkoko Donibane aretoan batu ziren bertsolariak, eta bertaratutakoen aurrean saio bikaina eskaini zuten. Sarrera guztiak agortu zirela jakinarazi du Bizkaiko Bertsozale Elkarteak.

Lekeition, Koldo Gezuraga Seijidok lortu zituen puntu gehien. Hain zuzen, 174,5 puntugaz nagusitu zen. 7,5 puntu gutxiagogaz sailkatu zen Peru de Pedro Larrea; 167 puntu eskuratu zituen. Garikoitz Sarriugarte Onaindia izan zen hirugarrena, 163,5 puntugaz.

Sarriugarterengandik hiru puntura, Inazio Vidal Gurrutzaga bertsolaria sailkatu zen laugarren, 160,5 puntugaz. Haren atzetik, Eneko Arrate Sololuze markina-xemeindarrak 158 puntu bildu zituen, eta Jokin Castaños Gonzalezek, berriz, 145.

Gaiak jartzen Amaia Ugalde Begoña aritu zen, eta epaimahaikideak Ander Arrien Aspiazu, Leire Etxebarria Gaztelu eta Mirari Azula Aurrekoetxea izan ziren. Idazkari beharretan, Karmele Gisasola Zenikazelaia egon zen.

Orozkon, Galarza. Asier Galarza Garai muxikarrak 185 puntugaz irabazi zuen atzo Orozkoko saioa. Berarengandik 17,5 puntura sailkatu zen Asier Alcedo Cano, 167,5 puntu eskuratuta, eta hirugarrena izan zen Iker Garitagoitia Astigarraga; 160,5 puntu bildu zituen.

Laugarren postuan, 153,5 puntu lortuta, Joseba Barandiaran Andueza sailkatu zen, eta haren atzetik Jontxu Martinez Zarrabeitiak 119 puntu bildu zituen.

Aitor Ruiz Urizar lekeitiarra ere Orozkoko saioan egotekoa zen, baina ezin izan zuen, eta Janire Arrizabalaga Munduate gautegiz arteagarrak ordezkatu zuen. Arrizabalagak ez zuen puntuatu.

Saioan gaiak ematen Oier Iturralde Fernandez ‘Atano’ aritu zen. Epaimahaia, ostera, hurrengoek osatu zuten: Alaitz Etxanobe Bereziartua, Graxi Arregi Leonardo eta Jurgi Fuentes Goikoetxea. Idazkari beharretan, Itziar Basterretxea Olarreaga aritu zen.

Gaur, Busturian. Sailkapen fasetik puntuazioaren arabera sailkatuko dira bertsolariak Bizkaiko Bertsolari Txapelketara. Guztira 60 bertsolarik eman dute izena, eta bost egunetan jokatuko dira hamar saioak. Bi burututa, gaur Busturian eta Getxon jokatuko dira hurrengo bi saioak.

Busturiko Altamira auzoko kultur etxean izango dute hitzordua gaur, 18:30ean, eta bertan arituko dira Busturialdeko Aitor Etxebarrizarraga Gabiola gernikarra eta Iker Uriarte Urrutia bermeotarra. Horiez gain, Ander Aldazabal Olabarrik, Ander Anakabe Lekuek, Ander Uzelai Aristik eta Peru Vidal Gurrutxagak kantatuko dute.

Getxoko Muxikebarri zentroko Arrigunaga aretoan ere lehiatuko da beste saio bat. Han, Julen Ibarguengoitia Ordorika gernikarrak lehiatuko du. Beragaz batera, Bikain Urkiri Etxebarria ondarrutarra, Aitor Arrutia Azkueta, Aritz Landeta Terceño, Mikel Aiartzaguena Agirrebeitia etta Paule Ixiar Loizaga Legarra ariko dira.