Bermeoko txosna batzordeak ekitaldiz bete du uda
Uztailaren 3an hasita, kontzertu eta ekimen desberdinak egingo dituzte, hamabostero
Koronabirusak eragindako egoera dela eta, Bermeoko Txosna Batzordeak Uda Txosneroa antolatu du. Uztailaren 3an hasita, hamabostero ekitaldiren bat egingo dute, abuztuaren 28ra bitartean. Irailaren 7tik 16ra ospatzen dira Bermeoko jaiak, baina egoera berrietara moldatzeko beharrizana ikusi du Txosna Batzordeak. “Herrietako eragileek eta udalek kultura sustatzeko baliabideak dituzteka uste dugu eta, hori aintzat hartuta, ezin ginen eskuak gurutzatuta geratu”, aipatu du Txosna Batzordeak.
Hala, jaietako egitaraua uda osora zabaltzea erabaki dute. Osasun eta segurtasun neurriak zainduta, hamabostero eingo dituzte ekintza kulturalak. Herriko gune desberdinak egokituko dituzte horretarako: eskola publikoa, Baztarre eta Kabidxe. Euria eginez gero, ekitaldiak lekuz aldatu daitezkeela ohartarazi dute antolatzaileek, eta horren berri sare sozialetan emango dute.
Zirku barietea ikuskizunak eta bertso saioak zabalduko dute egitaraua, uztailaren 3an. Aforoa kontrolatu asmoz, ekitaldi bakoitzerako sarrerak bezperan salduko dituzte. Frontoiko takillan edo Kabidxen eskuratu ahal izango dira, 19:00etatik 21:00etara. Sarrera denak saldu ezean, ekitaldia bera hasi baino ordubete lehenago erosi ahal izango dira, ekitaldia egingo den lekuan bertan. Pertsona bakoitzeko bost sarrera erosi ahalko dira, zehaztu dutenez, eta kanbioekin ibili ez izateko, ordaindu beharreko diru kopuru zehatza eroateko eskatu dute.
Ekitaldi denetarako, gutxieneko prezioa ezarri dute, 3 eurokoa. Hala ere, hortik gorako borondatea onartuko du Txosna Batzordeak.
EGITARAUA:
UDA TXOSNEROA
Uztailak 3: 19:00etan, Eskola publikoan. (Aforoa: 250 lagun)
* Zirku barietea. Ostean, Bertso saioa: Nagore Beitia, Iker Uriarte, Onintza Enbeita eta Uxue Alberdi. Gai jartzailea: Koldo Gezuraga.
Uztailak 17: 19:00etan, Eskola publikoan. (Aforoa: 250 lagun)
*Kontzertuak: Keu, Haimar, Pablo Novoa/ Idoia Azurmendi
Uztailak 31: 19:00etan, Eskola publikoan. (Aforoa: 250 lagun)
*Kontzertuak: Sara Zozaya eta Sua.
Abuztuak 14: 19:00etan, Kabidxen.
*Ginkana Okasientie (12-16 urte artekoentzat)
Abuztuak 15: 10:00etatik aurrera, Kabidxen.
*Famili ginkana
Abuztuak 28: 19:00etan, Baztarren (Aforoa: 100 lagun)
*Titereska txotxongilo ikuskizuna, El Tendereteren eskutik.
*Mikroantzerkia, Xabier Ortuzarrekin.
