Astelehenean zabalduko dituzte Bermeoko kiroldegia eta liburutegia
Erabiltzaileek hainbat neurri hartu beharko dituzte.
Osasun eta segurtasun neurriak beteta, badoaz gutxi-gutxika zerbitzuak abiarazten. Hala, Bermeoko kiroldegiak eta liburutegiak ateak zabalduko dituzte berriro, astelehenean; hainbat zerbitzu eskaintzen hasiko dira.
Araneko kiroldegiak fitness gimnasioko kardio eta gihar guneak, biking gela (saio birtualekin) eta beheko gimnasioa (kardioa lantzeko makinekin) zabalduko ditu. Erabiltzaileek, hala ere, hainbat neurri hartu beharko dituztela jakinarazi dute udaletik.
- Harpidedunei zein langileei tenperatura hartuko zaie kiroldegira sartu aurretik.
- Oinetakoak eta eskuak desinfektatu beharko dira kirol guneetara sartu aurretik.
- Irekiko dituzten zerbitzuak erabiltzeko hitzordua hartu beharko da. Kiroldegiaren helbide elektronikoan (https://www.tramiteakonline.bermeokoudala.eus/tramiteakonline/) edo telefono bidez (94-617 91 80).
- Sarzeko derrigorrezkoa izango da hurbiltasun txartela.
- Maskara eroatea derrigorrezkoa izango da. Kardio guneetan eta saio zuzenduetan kendu ahal izango dira.
- Harpidedunek eskuoihala eta ura eroan beharko dituzte.
- Sarreran eta harrera guneetan markatutako bi metroko segurtasun tarteak errespetatu beharko dira.
- Kirol egiteko arropa soinean eroan beharko dute erabiltzaileek, aldagelak eta kutxatilategiak zarratuta egongo baitira.
Liburutegiak ere ateak zabalduko ditu astelehenean, zerbitzu guztiak eskainiko ez dituen arren. Umeen liburutegia eta hemeroteka, adibidez, zarratuta egongo dira. Ikasketa gelak, ordea, irekita egongo dira, baina aforo erdiarekin.
Ordutegia honakoa izango da: astelehenetik barikura, 09:00etatik 15:00etara, eta zapatuan, berriz, 09:30etik 13:00etara.
Bestalde, Maileguak eta itzulketak etxean zerbitzua eten egingo dutela jakinarazi dute, erabiltzaileek film eta liburuak liburutegian bertan eskuratu eta itzuli ahal izango dituztelako. Hala ere, maileguak aldez aurretik eskatu beharko direla azaldu dute, 94-617 91 51 telefonora deituta edo liburutegia@bermeo.eus-era idatzita. Sareko katalogoa kontsultatu ahal izango dute erabiltzaileek.
