Unesco Etxeak bi prestakuntza beka emango ditu beste behin ere
Bekak 18 eta 30 urte bitarteko gazteei zuzendutakoak dira. Zortzi hilabeteko prestakuntza praktikorako egonaldia eskainiko die gazteei.
Aurten ere Unesco Etxeak Natura Ondare eta Klima Aldaketa Zuzendaritzaren laguntzagaz, ordaindutako bi prestakuntza beka eskainiko ditu gazteek Urdaibaiko Biosfera Erreserban praktikak egin eta prestakuntza jasotzeko.
Gazteak Biosfera Erreserben etorkizuna dirala diote, eta beren lurraldearen antolamenduan esku hartzeko aukera eman behar zaiela gaineratu dute, bai eta prestakuntza jasotzekoa ere, Biosfera Erreserbak kudeatzen laguntzeko eta haien garapen iraunkorra sustatzeko. Bekak 18 eta 30 urte bitarteko gazteei zuzendutakoak dira.
Bekak zortzi hilabeteko prestakuntza praktikorako egonaldia eskainiko die gazteei (2020ko maiatzaren 1etik abenduaren 31ra) lanaldi erdira. Beka jasotzen duten bi gazteek Urdaibaiko Patronatutik egingo dute lan, Busturiko Ekoetxea Urdaibaitik, hain zuzen ere.
Bekak ematerako orduan kontuan izango dute Urdaibaiko Biosfera Erreserbagaz lotura izatea (bizilekua, lana, ikasketak, ikerketa…) edota Urdaibairentzat interesagarria den garapen iraunkorrarekin lotutako sektoreetan prestakuntza eta esperientzia izatea (ingurumena, turismoa, komunikazioa…).
Euskara eta ingeles maila altuak edukitzea eskatzen dute, bai eta motibazioa eta komunikatzeko gaitasuna izatea ere. Jakinarazi dutenez, lehentasuna izango dute langabezian dauden gazteek.
Beka jasotzen duten bi gazteek bekarekin lotutako jardueretan parte hartu beharko dute, eta gainera, Urdaibai Biosfera Erreserbarako Zerbitzuan martxan dauden proiektuetan lagundu beharko dute. Amaitzerakoan, beka amaierako txostena egin beharko dutela azaldu dute Unesco Etxetik.
Interesa daukatenek curriculuma, motibazio gutuna eta Urdaibai Biosfera Erreserbarekin lotura bat ziurtatzen duen dokumenturen bat aurkeztu beharko dituzte. Langabezian dauden horiek, egoera horren ziurtagarie ere aurkeztu beharko dute. Hautagaitzak apirilaren 13ra arte bidali daitezke Urdaibai beka jarrita n.viota@unescoetxea.org helbide elektronikora.
