Galdu barik jarraitzen dute basurdeek
Asteburuan Zarautzi 40-6 irabazita, Ohorezko B mailan 17. jardunaldi jarraian irabazi ditu Gernika RTK. Denboraldi honetan bi partidu galdu ditu.
Ohorezko B mailako taldeei bi jardunaldi geratzen zaizkie 2019-2020 denboraldia amaitzeko, eta Gernika Rugby Taldeak garaipenak pilatzen jarraitzen du. 20. jardunaldian 40-6 irabazi dio Babyauto Zarautz Rugbyri.
Porrotik jaso barik 17. jardunaldi jarraian daramatza talde gernikarrak. Hain zuzen, denboraldi honetan soilik bi partidu galdu ditu: 3. jardunaldian Getxoren kontra (15-18) eta 5. jardunaldian Bilbao Rugbyren kontra (15-20).
Basurdeek eta zarauztarrek zapatuan jokatu zuten Urbietan. Beste behin ere, etxeko taldea indartsu zelairatu zen, eta hamar minuturen barruan, markagailuan aurretik jarri zen, Peio Urrutiaren bi entseguri esker.
14-0ko markagailuagaz, basurdeak apur bat erlaxatu ziren, eta aurkariak aurrera pauso bat ematen saiatu ziren. Jokoa geldoa izan zen; touch eta mele asko ikusi izan ziren, eta horietan etxekoak izan ziren jaun eta jabe. Lehen ordu erdia bete aurretik, Zarautzek zigor ostiko bategaz lortu zituen lehen puntuak (14-3). Gernikarrek Langi Lolotongaren entsegu bategaz erantzun zieten, eta horrela ailegatu ziren atsedenaldira (21-3).
Bigarren zatian, etxeko taldea nagusi izan zen jokoaren ikuspegi orotan. Zarautz nekatuago, lehen zatian baino ahulago zelairatu zen. Hala ere, bigarren zatia hasi eta bost minutura, zigor kolpe bategaz beste hiru puntu eskuratu zituzten aurkariek. Berriro ere basurdeek entsegu bategaz erantzun zieten; Eder Martinezek egin zuen etxekoen laugarren entsegua.
Partiduaren azken hogei minutuetan, talde gizpuzkoarraren bi jokalarik txartel horia ikusi zuten minutu bateko aldeagaz. Beraz, hamar minutuz etxeko taldea bi jokalari gehiagorekin aritu zen, eta bere gailendu zen. Neurketa bukatzeko hamar bat minuturen faltan, Lolotongak egin zuen Gernikaren bosgarren entsegua, eta bi minutu beranduago, Simon Lilicamak bi seigarrena eta azkena.
Bost puntu gehiago. Ohorezko B mailaren A multzoan, bigarren postuan segitzen du Gernika RTk. Zapatuan bost puntu gehiago lortuta, 84 puntu ditu, Getxo liderrak baino sei puntu gutxiago.
Asteburu honetan etxetik kanpo jokatuko dute basurdeek. Gaztedi RTren kontra ariko da talde gernikarra azken aurreko jardunaldian. Gaztedi egun, zazpi garaipenekin hamargarren postuan dago sailkapen orokorrean. Lehen itzulian bi taldeek jokatutako neurketan Gernika RTk lortu zuen garaipena Urbietan (55-0).
