Urtero egin legez, domekan jaiotza jarriko dute Burgon
09:00etan jarri dute ordua, Atalde kaleko Artike enparantzan. Handik elkarrekin egingo dute Burgorako bidea.
Argazkia: Sollube 707 Aurten ere ez du hutsik egingo Sollube 707 mendizale taldeak, eta Kontzezio Egunean Burgora joango dira tontorrean jaiotza jartzera. Horretarako, mendizaleek irteera antolatu dute domekarako; 09:00etan jarri dute ordua, Atalde kaleko Artike enparantzan. Handik elkarrekin egingo dute Burgorako bidea.
Mendi taldekoek gogorarazi gura izan dute, gurasoek seme-alabekin batera egiteko irteera “polita eta erraza” dela. Hainbat izaten dira, gainera, urtero parte hartzera animatzen diren ume eta nagusiak, “elkarrekin, ondo pasatzeko aukera ematen baitu”.
Mendi tontorrera igota, urtero egiten duten modura, ikurrina altxatu eta jaiotza jarriko dute. Ondoren, indarrak berreskuratzeko txistorra jana egingo dutela azaldu dute antolatzaileek.
Eguraldi ona eginez gero, Burgon bertan egingo lukete txistorrada. Euria egingo balu, berriz, Mañuko frontoira jaitsi, eta han egingo lukete.
Gabonei hasiera emateko, eta era berean, familian egiteko irteera polita dela iritzita, herritar guztiak animatu dituzte parte hartzera.
