Lointek Gernika Bizkaiak IDK Gipuzkoaren kontra lehiatuko du Euskal Koparen finalaurrekoa
RPK Araski eta GDKO Ibaizabal taldeen artekoa izango da barikuko beste finalerdia. Domeka eguerdian jokatuko dute finala.
Argazkia: Euskadiko Saskibaloi Federazioa. Emakumezkoen Liga ate joka dago, eta lehen jardunaldiaren aurretik, Euskal Kopa lehiatuko dute asteburu honetan, Durangoko Landako Kiroldegian.
Lointek Gernika Bizkaiak IDK Gipuzkoa izango du aurkari finalaurrekoan; barikuan (irailak 20) 20:00etan jokatuko dute. Aurretik, RPK Araskik eta GDKO Ibaizabalek lehiatuko dute finalerdia (17:45). Talde gasteiztarra da azken bi urteetako txapelduna, eta Galdakaoko taldea aurre-fasea irabazita sailkatu da finalaurrekoetara. Finala domekan (12:00) lehiatuko dute, eta baita hirugarren eta laugarren postuak erabakitzeko neurketa ere.
Ligara sasoian heltzeko zereginean, azken prestaketa izango dela adierazi du Naiara Diez Lointek Gernika Bizkaiaren kapitainak: “Dia Liga hasteko oso gutxi geratzen da– irailaren azken asteburuan lehiatuko dute lehen jardunaldia–, eta guretzat titulu garrantzitsua da. Ligako hiru talde onenetakoak torneo honetan egoteak daukan kalitatearen adierazgarria da”. German Monge Euskadiko Saskibaloi Federazioaren presidenteak ere hori nabarmendu du gaur egin dute aurkezpenean: “Emakumezkoen Ligako hiru euskal taldeek zazpi onenen artean amaitu zuten aurreko denboraldia”. Federazioak aukera berdintasunean jarduteko duen konpromisoaz ere mintzatu da Monge.
Iratxe Rodriguez Araskiko presidenteak denboraldiko lehen titulu ofiziala lehiatzeko ilusioz daudela esan du, eta titulua berrestea espero dutela: “Liga bermeekin hasteko azken ukituak egiteko balioko digu; zelan gauden ikusteko. Saskibaloiari zein giroari dagokionez, asteburu itzela izango da”. Gorka Paternina talde galdakaoztarraren presidenteak gozatzeko eta lehiatzeko gogotsu daudela azpimarratu du: “Saskibaloia harrobira hurbildu nahi dugu, eta horretan laguntzen du Euskal Kopak”.
Sarrerak. Partiduetarako sarrerak doakoak badira ere, sarrerak aurrez eskuratzea gomendatu dute. Bilboko Euskadiko Saskibaloi Federazioaren egoitzan (Moyua Plaza 6, 1 ezk) eta Durangoko Kuttun Gastro Bar-en eskuratu daitezke aurretiaz, eta sarrerak geratzen badira, partiduen egunetan ere jarriko dituzte leihatilan.
Durangon gaur egin duten aurkezpena. Argazkia: Euskadiko Saskibaloi Federazioa.
