Kultur aniztasuna sustatzeko ikuskizunak egingo dituzte Arratzun eta Foruan

Ipar Eszena Bidea izeneko elkartruke kulturalerako proiektua aurkeztu dute Donejakue Bidearen iparraldeko ibilbidea zeharkatzen duten erkidegoetako dantza eta antzerki konpainiek. Zortzi ikuskizun egingo dituzte 32 emanalditan eta horietako bana hartuko dute Arratzuk eta Foruak.

Ane Maruri Aransolo

Arratzu,Forua

2019/09/12

Bizkai, Araba eta Gipuzkoako, Kantabriako, Asturiaseko eta Galiziako dantza eta antzerki produktoreen elkarteak bultzatu du ekimena; guztira zortzi dira parte hartuko duten ekoizleak.

Zortzi ikuskizun 32 emanalditan burutuko dituzte, eta horietako bana hartuko dute Arratzuko eta Foruko bizilagunek. Arratzun, irailaren 21ean 20:00etan hasita, Espacio Espiral Kantabriako konpainiak Beatus, visiones del Apocalipsis ikuskizuna eskainiko du San Tomas Apostoluaren elizan. San Juan eta T.S. Eliot autoreen testuetan eta Europako tradizioko ipuinetan oinarritutako lana da hori. Forun, bestalde, urriaren 4an 18:30ean eskeiniko dute ikuskizuna San martin de Tours eliza atzean. Bertan, Galiziako Baobab Teatrok Andrea Bayer-en Luppo ikuskizuna erakutsiko du. Gaztelaniaz izango da eta pasarte batzuk galizieraz egingo dituztela jakinarazi dute. Familiei zuzendutako lana da –4 urtetik gorako haurrei zuzenduta–.

Proiektua erromesaldiaren ideian oinarritzen da, “bide eszeniko” bat eraiki gura duelako. Hala, erkidego horietako produkzio eszenikoen kultura, hizkuntza, formatu eta lengoai aniztasuna plazaratuko dute.

Gainera, dinamizazio turistikoaren, ondarearen eta profesionalen hainbat gako barne hartzen dituzte antzezlanek: “Emanaldiak egingo diren espazioen dinamizazio sozial, kultural eta turistikoan ere lagundu gura du, iparraldeko bidea helmuga turistiko bezala indartuz, eta lurralde ezberdinetako ondare arkitektonikoari bere balioa emanez”.

Halaber, bizilagunak gehiago eta hobeto ezagutzeko helburuagaz sortu dela Ipar Eszena Bidea diote antolatzaileek, eta ikusleei beste produkzio eszenikoak ezagutzeko aukera ematen dietela ere nabarmendu dute.

Hala, proiektuagaz, zenbait mendetatik gaur egunera arte Done Jakue Bideak elkartzen dituen ibilbide kultural eta historikoak baliatuz, kultura “bide berria” sortuko dute antzerki eta dantza ikuskizunekin, topaketekin, jardunaldiekin eta sorkuntza egonaldiekin.

Elkar ezagutzeko aukera. Dantza eta antzezlanez gain, proiektu kulturalak inguruko profesionalen elkarrezagutza sustatu gura du. Horretarako, ekintza profesionalak eta tailer zein bilguneak antolatu dituzte Bilbon, Santanderren (Kantabria), Gijonen (Asturias) eta Santiagon (Galizia).

Hori horrela, urriaren 1etik 8ra bitartean ikuslea ikuskizunagaz lotzea ahalbidetzen duten tailerrak eta hitzaldiak egingo dituzen Harrobia Produkzio Eszenikoen berrikuntza zentroan.