Zarragoitxiko bizilagunek auzolana egingo dute bihar
09:30ean batuko dira auzoko sarreran.
Zarragoitxi kalea. Argazkia: Bermeoko Udala Bermeoko Zarragoitxi auzoko bizilagunek auzolanetan parte hartzeko deia egin dute.
Auzoko Aldatz Gora Elkarteak deituta, bihar, 09:30ean auzoko sarreran batuko direla jakinarazi dute. Elkarteko ordezkariek zehaztu dutenez, egin beharreko lanak taldeetan banatuko dituzte: “batzuk auzolanak egiten ari diren bitartean, beste batzuek denentzako hamaiketakoa prestatzen edota bestelako zereginekin ibiliko dira”.
Elkartearen helburuak “Zarragoitxiko beharrizanak herrira zabaltzea” eta, ekintza eta lan desberdinak eginez “auzo bateratu bat lortzea” dira. Hori lortuz gero, “Zarragoitxi garbi, atsegin eta seguru bat” edukitzea bilatzen dute.
Izan ere, Zarragoitxiko biztanleak “segurtasun eta mantenu gabezia” erreklamatzen aritu dira azken urteetan. Azaldu dutenez, Bermeoko Udalaren erantzunak jasotzen ari dira, “gutxi gutxika”.
