Hilaren 31ra arte eman ahalko da izena Zilekoa neska bertsolari gazteen topalekuetan egoteko

Bertsozale elkarteko webgunean galdetegi bat erantzunda apuntatu beharko dira interesatuak. Otsailaren 2an izango da lehenengo saioa.

Ane Maruri Aransolo

Busturialdea

2019/01/22

Zilekoa neska bertsolari gazteen topalekua hirugarrenez egingo da aurten, eta lehenengo hitzordua otsailaren 2an jarri dute. Zilekoan parte hartzeko urtarrilaren 31ra arte eman ahalko da izena, eta Bertsozale elkarteko webgunean galdetegi bat erantzunda apuntatu beharko dira interesatuak.

Zilekoa topagunearen helburuak berbera izaten jarraitzen du: Bizkaiko neska bertsolari gazteen topaleku izatea, euren arteko konfiantza sarea sendotzea, eta bertso eskoletatik plazarako bidean nesken ahalduntzean eragitea.

Iazko saioetako bat. Argazkia: Bertsozale elkartea.

Lau saio egingo dituzte, eta bakoitzean bertsoaren munduan erreferentea den emakume baten bisita edukiko dute bertaratzen direnek; lehenengoa bisita Onintza Enbeita bertsolari muxikarrarena izango da. Enbeitaz gain, Uxue Alberdi eta Ines Osinaga joango dira hurrengo topalekuetara. Bertsolariek euren bizipenak kontatuko dituztela zehaztu dute antolatzaileek, eta horiek bukatzean, bertso eskola egongo dela jakinarazi dute.

Zapatu goizetan Larrabetzun eta Durangon izango dira topaketak, eta Miren Amurizak eta Oihana Bartrak zuzenduko dituzte. saioak Bigarren saioa martxoaren 2an izango da, eta hirugarrena apirilaren 13an; amaierako jaia, berriz, maiatzaren 4an egingo dute.

Parte hartzea. Bertsozale elkarteak parte hartu gura duten guztiak ondo etorriak direla adierazi du, baina, bertso eskola bat dela gogorarazi du bertsoetarako gutxienezko gaitasuna izatea “beharrezkoa” dela esanez.

Zilekoaren saioak doakoak dira, eta izena ematen dutenen konpromisoa eskatu dute antolatzaileek, “besteak beste, bertso eskolako tartea antolatu ahal izateko”.