Gernika-Lumoko eta Bermeoko atletismo taldeetako kideak dominekin bueltatu dira Bizkaiko Txapelketatik
Donostiako belodromoko pistan, absolutu mailako Bizkaiko eta Gipuzkoako Txapelketak jokatu zituzten zapatuan, eta bertan izan ziren Bermeoko eta Gernika-Lumoko atletismo taldeetako ordezkariak.
Gernikako Atletismo Taldeko Patrik Saitua arteagarrak, distantzia proban, Bizkaiko txapela eskuratu zuen. Bederatzi minutu eta 22 segundoko marka egin zuen 3.000 metroko lasterketan.
Roberto Floresek entrenatzen duen mutilak kilometro bakoitza, bataz beste, hiru minutu eta zazpi segundotan egin zuen. “Pozarren nago, nire aurreikuspenak hobetu ditut. Ondo sentitu nintzen lasterketa osoan zehar, eta zangoak bizkor”, adierazi du Saituak. Gernika ATko arduradunek azaldu dutenez, Saitua ez da distantzia honetan espezialista; halako probak duatloiaketa triatloiak prestatzeko baliatzen ditu.
Espainiako txapelketara. Bermeoko Taraska taldeko Lorea Erekatzok ere marka bikaina lortu zuen. 800 metrotan jantzi zuen Bizkaiko urrezko domina, eta 18 urtez azpikoetan, Espainiako pista estaliko txapelketa lehiatzeko txartela eskuratu zuen–martxoan Valentzian jokatuko dute–. Halaber, Iker Ormazak zilarrezko domina irabazi zuen, luzera jauzian, eta laugarren sailkatu zen 400 metroko proban.
Talde bermeotarraren arduradunek nabarmendu dutenez, kide denak «oso ondo» lehiatu zuten txapelketa, eta laugarren postu “asko” lortu zituzten. “Adibidez Garazi lertzundi laugarren geratu zen pisu jaurkietan, Izaro Egibar 800 metrotan eta Raluka 1.500 metro eta 3.000 metrotan”.
Bizkaiko kros Txapelketa. Bestalde, Gernika ATko gizonezkoen beteranoen taldeak bederatzigarren postua lortu zuen Bizkaiko Kros Txapelketan, domekan. Bizkaiko hamasei taldek parte hartu zuten Muskizen, eta
talde gernikarra hirukote honek osatu zuen: Aitor Uriarte, Urko Mantzizidor eta Humberto Unzueta. Hiruren postuen batuketari esker sailkatu ziren bederatzigarren. «Aitor Uriarte lasterketa bikaina egin eta seigarren helmugaratu zen. Urko Mantzizidor busturiarrak ere karrera dotorea egin zuen krosean egin duen estreineko lasterketan».
Halaber, kategoria txikietako lasterketak ere lehiatu zituzten, eta bertan egon ziren bertoko taldeak.
