Gernika KESB-ek hitzarmena sinatu du Zornotza eta Tabirako saskibaloi taldeekin
Astelehenean egin zuten sinadura ekitaldia Zornotzako Zelaieta Zentroan. Hitzarmenaren asmoa elkarlana sustatzea, indarrak batzea, jokalarien hobekuntzaren alde lan egitea eta saskibaloiaren sustapena egitea dira.
Indarrak Batzen hitzarmenaren funtsa azaldu zuen Gernika KESB taldeko presidente Gerardo Candinak: “guztiok gure aldetik zerbait jarri eta gure klubetako edozein mailatako jokalari orok gorengo mailan aritzeko aukera edukitzea da hitzarmenaren helburua”. Zornotza Saskibaloi Taldeko presidente Joxe Etxebarriak gehitu zuen askotan jokalari bizkaitarrak ez direla gorengo mailetara iritsi klubek eduki duten egoskortasunarengatik: “uste dugu indarrak batuta eta halako hitzarmenekin hurrunago heldu gaitezkeela“. Bizkaiko Saskibaloi Federakuntzaren aldetik ere zorionak jaso zituzten hiru taldeek sinatutako hitzarmenarengatik. Koldo Mendia presidenteak zoriiondu zituen hiru taldeak.
Argi utzi nahi izan zuten ez dela inoren aurka egiteko hitzarmen bat, baizik eta sinergia positiboak baliatu eta eliteko jokalaria izan daitekeen inor erdi bidean ez geratzeko egindako hitzarmena. Gaineratu zuten hiru taldeetako inork ez duela galduko euren berezko izaera baina “elkarrengandik ikasteko, elkar elikatzeko eta guzti horretatik irabazle jokalariak ateratzeko” sinatu dute hitzarmena. Sinadura ekitaldia astelehenean egin arren denbora asko daramate hiru taldeek elkarri laguntzen: “orain sinatu dugu, eta ofizial egin nolabait, baina egia esan bide luzea egin dugu elkarrekin orain arte, nahiz eta itzalean izan”.
Hitzarmena lau puntutan laburtu dute hiru taldeek. Arlo tekniko eta taktikoan lan taldak sortu eta teknifikazioa lantzea, nazioarteko txapelketetara elkarrekin joatea, emakumeen saskibaloia sustatzea Gernikako jokalarien bisiten bitartez eta entrenatzaileen arteko elkarreragina areagotzea eztabaida foroak sortuz eta beste taldeen entrenamenduetara bisitak eginez.
Taldeetako eta Bizkaiko Federakuntzako presidenteak. Argazkia: Gernika KESB
Gernikako, Zornotzako eta Tabirakoko presidenteak hitzarmena sinatzen. Argazkia: Gernika KESB
