Talako Txirritxa kaleko aparkalekuaren lanak hasiko ditu Bermeoko Udalak
Aste honetan hasiko dituzte lanak, eta sei asteko iraupena edukiko dutela aurreikusi du udalak.
Lan horien berri Irune Ormaetxea Bermeoko Urigintza zinegotziak eta Aritz Abaroa EAJ-PNV udal taldeko bozeramaileak eman dute. Izan ere, lan horiek Udal Gobernuaren eta EAJ udal taldeak Ondasun Higiezinen Gaineko zergaren tipoa onartzerakoan adostutako akordioaren emaitza dira.
Udaletik azaldu dutenez, obrekin gaur egun dagoen aparkalekuaren egoera hobetzea bilatuko dute, batez ere segurtasuna eta irisgarritasuna bermatzeko helburua izanik. Hori lortzeko, gaur egun kalea zeharkatzen duen espaloia luzatuko dute. Horrez gain, guneko argiteria hobetuko dutela nabarmendu dute, eta horretarako kale-argi berria jartzea aurreikusten dutela adierazi dute.
Talako lanak. Udal Gobernuak eta EAJk onartutako akordioaren barne, Txirritxa kaleko lanekin batera Talan irisgarritasuna bermatzeko lan gehiago egin dituztela azaldu dute: urtarrilean, Talako Andra Mari kalean espaloi berri bat eraikitzeko lanak hasi zituzten, Tonpoirako bidean hain zuzen ere, Talako beheko kalera doan bideko irisgarritasuna hobetu ahal izateko.
Zehaztu dutenez, espaloiak bi metroko zabalera dauka eta hormaren kontra ezarri dute. Espaloia jarri ondoren, toki horretan irisgarritasuna bermatzeko beste ekintza osagarri batzuk egin dituzte: besteak beste, Talako Andra Mari kaleko behe aldean dauden eskailera zaharren ordez, eskailera berriak eraiki dituzte.
Ildo berean, baranda berria jarri eta zebrabide irisgarria egin dute, espaloi berritik beste aldeko espaloira pasatzen dena. Irisgarritasuna hobetzeagaz batera, jaitsiera horretan argiteria hobetu dute. Horrez gain, euri urak batzeko sistema egindako lanetara egokitu dute, eta Talako Andra Mari kaleko behe aldean errepidea zabaldu dute biraketa gunea egoera berriari egokitzeko asmoagaz.
Bizi kalitatea hobetuz. Ormaetxeak obren aurrekontuari buruzko datuak eman ditu. Zehaztu duenez, lan guztiek 106.389 euroko kostua izan dute. “Lan horiek herritarren eta bereziki Talako bizilagunen bizi kalitatea hobetzen lagunduko dute, izan ere, irisgarritasuna eta segurtasuna hobetuko dituzte eta hori gure lehentasuna da”, adierazi du zinegotziak.
Abaroaren berbetan, “argi geratu da lortutako akordioak oso positiboak direla herriarentzat eta bermeotarrontzat. Akordio honekin hemendik aurrera ere lanean jarraituko dugu Zarragoitxi, Itsasbegi eta Iparragirre auzoetarako mahaigainean ipini ditugun konpromisoak gauzatzeko eta herritarrei emandako berba betetzeko”.
Aritz Abaroa eta Irune Ormaetxea. Argazkia: Bermeoko Udala.
