Garaipenagaz hasi du liga Lointek Gernika Bizkaiak
Nagusitasunez irabazi zuen atzo Lointek Gernika Bizkaiak Dia Ligako lehen partidua. Sant Adria talde kataluniarrari 42-77 irabazi zion. Hala, ligako lidergoa eskuratu dulehen jardunaldian. Indartsu hasi du denboraldia talde gernikarrak, eta kataluniarrak baino hobeto aritu ziren Madrilen ospatutako Open Day-an. Defentsa gogorragaz eta errebotea ondo babestuta saskiratze errazak lortu zituen Lointekek.
Vamderwal-ek, Dietrick-ek, Gwathmey-k, Roundtree-k eta Berezhyska-k osatu zuten aurtengo ligako lehen bostekoa. Bi minutu eta erdi behar izan zituzten lehen saskiratzea eskuratzeko, baina hori lortuta, erasoan erraz aritu ziren jokalariak. Azpimarratzekoa izan zen Vanderwal-ek izan zuen kemena. Bera izan zen norgehiagokako lehen bi puntuak lortu zituena. Markagailuari buelta emateko asmoagaz, kataluniarrak hirukoekin animatu ziren, baina hamar saiakeratatik bat ere ez zuten lortu. Hala, 6-18ko emaitzagaz amaitu zen lehen laurdena.
Bikain aritu ziren hurrengo minutuetan Lointekeko jokalariak. Sant Adria zonakako defentsagaz saiatu zen, eta gernikarrek berriz, denetariko defentsak probatu zituzten. Ariztimuño eta Molina bikain aritu ziren defentsan. Nagusitasunagaz jokatu zuten bigarren laurdena talde gernikarreko jokalariek, eta markagailuan ihes egin zuten; 27 puntutik gora egotea lortu zuten.
21-47ko markagailuagaz joan ziren atsedenaldira taldeak. Hirugarren laurdenenaren hasieran nahi baino gehiago barkatu zuten Lointekeko jokalariek, baina defentsa sendotu zuten. Lucila Pascuaren lana azpimarragarria izan zen, eta 34-59 bukatu zuten. Azken txanpan lehen zatian izandako jokoa mantendu zuten jokalariek eta buru belarri aritu ziren erasoan. Azken emaitzak erakusten duen 35 puntuko aldea da Lointekek emandako erakustaldiaren adierazgarri nagusia.
Eguaztenean, Valentziarren aurka. Astebete etxetik kanpo igaro ondoren, dagoeneko etxean daude. Eguaztenean, baina, Valencia Basketen aurka jokatuko dute Dia Ligako bigarren jardunaldia. Malosten ariko dira valentziarren aurka 20:00etan.
Lucila Pascua baloiagaz. Argazkia: Gernika KESB
