Forutik Forura probaren 10. urteurrena jai giroan ospatuko dute domekan
Haitz Biribil elkarteak modu berezian prestatu du aurtengo Forutik Forura proba. 10. urteurrena betetzen duela-eta, jai giroan igaroko dute eguna, eta horregatik, Forutik Forura Mendi Jaia izena jarri diote aurtengo probari.
Domekan (irailak 30) dute hitzordua herriko zein inguruetako mendizaleek. Martxa luzea zein laburra eta Urdaibai Koparen barruko lasterketa egingo dituzte. Hain zuzen ere, koparen azken aurreko proba da.
Azken lasterketa Gorozikan lehiatuko dute, urriaren 7an. Asteon jakitera eman dutenez, aurrez izena emateko epea luzatu dute; urriaren 4a arte izena eman daiteke Urdaibai Koparen webgunean.
Mendi martxa luzearen eta lasterketaren parte hartzaileek ibilbide bera egingo dute; 21,5 kilometrokoa izango da.
Martxa egitera doazenak izango dira goiztiarrenak. Horiek 08:30ean irtengo dira Haitz Biribil txokoaren paretik. Korrikalariek, ostera, 10:30ean dute irteera-ordua. Jarraian, mendi martxa laburrekoen txanda izango da. Horiek 8 kilometroko ibilbidea egingo dute.
Anoa postuak. Ibilbide luzeena egiten duten oinezkoentzat zein korrikalarientzat hiru anoa postu jarriko dituzte antolatzaileek. Foruko Baldatika auzoan (likidoa eta solidoa), Muruetako txokoan (likidoa eta solidoa) eta Foruko harrobiaren azpian (likidoa) izango dute indarberritzeko aukera. Martxa laburreko ibilbideak, ostera, anoa postu bakarra edukiko du, Muruetakoa.
Eguerdian lasterketaren sariak banatu eta parte hartzaileen artean askotariko material eta produktuak zozkatu ostean, herri bazkarian elkartuko dira. Haitz Biribil elkartearen kideek jakitera eman dutenez, 70 pertsonak izena eman dute bazkaltzeko. Arratsaldean, berriz, umeen jolasekin eta musikagaz borobilduko dute urteurren jaia.
Eguraldi ederra iragarrita dago etzirako eta antolatzaileek egunean bertan ere jendeak izena ematea espero dute: “Momentuz izandako erantzunagaz pozik gaude. Jende asko animatu da, eta espero dugu domekan jende gehiagok izena ematea. 10. urteurrena gugaz ospatzera gonbidatzen ditugu denak”.
FORUTIK FORURA MENDI JAIA:
- 07:30. Izen emateak.
- 08:30. Mendi Martxa Luzea.
- 10:30. Lasterketa.
- 10:35. Mendi Martxa laburra.
- 13:00. Laguntzaileek emandako oparien zozketa.
- 13:15. Lasterketaren sari banaketa.
- 15:00. Bazkari Herrikoia.
- 16:00. Musika taldea Etxebarria aita-semeak, eta umeen jolasak.
