Pailazoez, dantzaldiaz edota jolasez gozatzeko aukera edukiko dute umeek bihar, ikasturteari bukaera emateko
Herriko ikastetxe guztietako 3 urtetik 12 urte bitarteko haurrek ez dute aspertzeko astirik izango Bermeoko ikasturte amaierako jaian, hainbat baitira eurentzat antolatu diren ekimenak: pailazoak, dantzaldia, umeentzako parkea, eta zirko ikuskizuna, besteak beste. Gainera, aurten berritasun bat izango du jaiak; izan ere, ume eta gazte guztiek bitsarekin gozatzeko aukera izango dute.
1400 ume eta gaztetxo baino gehiago bilduko dira jaialdian, eta Aingeru Astui Bermeoko Kultura zinegotziak azaldu duenez, festa horregaz ikastetxe guztietako umeak ekintza batean elkartu nahi dituzte “egun zoragarri bat igarotzeko”.
Egun osorako ekintzak. Prestaturiko ekintzak adinaren araberakoak izango dira. Adibidez, haur hezkuntzako hiru urtetik gorako umeek Tomaxen abenturak pailazoen ikuskizuna ikusteko aukera izango dute, 10:30ean, Sagrado Corazon ikastetxean.
LHko 1. eta 2. mailetako haurrek Kantu Kolore taldearen eskutik, Far west dantzaldiarekin gozatzeko aukera edukiko dute Bermeoko Kafe Antzokian, 10:15ean. Bestalde, LHko 3. eta 4.mailetako neska-mutilentzat 10:00etatik aurrera umeentzako parkea egongo da Lameran, eta bertan basket bunge, indiar txirrista, ipotxa, zezen mugikorra, pista amerikarra, giza futbolina eta rokodromoa egongo dira, besteak beste. Euria balitz, Artza frontoira lekualdatuko dira puzgarri batzuk.
LHko 5. eta 6.mailetako gazteek Zirika Zirkus taldearen eskutik, Tren geltokia izeneko zirku ikuskizunarekin ondo pasatzeko aukera izango dute 10:15ean, San Frantzisko Herri ikastetxean. Goizeko ekitaldiak amaitzeko, 12:00etan hainbat mailatako ikasleak batuko dira, bitsarekin ondo pasatzeko. Horregatik, umeei bainujantzia ekartzea gomendatzen zaie.
Ekitaldiak ez dira bakarrik goizean egongo; jaialdiari bukaera emateko, 16:00etatik 19:00etara umeentzako parkea egongo da Lameran. Astuik egun “polita” izango dela nabarmendu du, eta nagusi, ume eta gaztetxoak jai horretan mahoiez jantzita parte hartzera animatu ditu.
