Araneko kiroldegiko kantxan LED teknologiadun argiak jarri dituzte
Lehen zeuden 25 argiak kendu eta LED teknologiadun 22 argi jarri dituztela esan du kirol zinegotzi Irune Ormaetxeak.
Ormaetxearen arabera, argi gutxiago kontsumituko da, eta aurreztea ahalbidetuko du. Kantxa, gainera, hobeto argiztatuko da, «lehen gune batzuk txarto argiztatuta zeudelako». Beste alde batetik, argiak aldatzea errazagoa izango dela ere esan du: «lehen argiak aldatzeko aldamioa erabili behar zen, orain, berriz, ez da beharrezkoa izango».
LED teknologiadun argiak jartzeko 9.000 euroko inbertsioa egin dute. Inbertsioa, hala ere, hiru urte inguruan amortizatzea aurreikusten dute.
Bermeoko Udal Kirol Patronatuaren helburuetako bat, instalazioen kudeaketa eraginkorra egitea dela gogorarazi du Ormaetxeak, eta egindako inbertsioa helburu horrekin bat datorrela gaineratu du.
