Sareginen lana goraipatu dute
Bermeoko saregin guztien ordez berba egin dute Mari Karmen San Pedrok, Juani Maceirak, Maria Uriondok eta Bitore Urkijok. Lehengo eta oraingo sareginen lan egiteko moduak azaltzeko aukera eduki dute.Uurtero, herriko emakumeen kolektibo bat aukeratzen ...
Bermeoko saregin guztien ordez berba egin dute Mari Karmen San Pedrok, Juani Maceirak, Maria Uriondok eta Bitore Urkijok. Lehengo eta oraingo sareginen lan egiteko moduak azaltzeko aukera eduki dute.
Uurtero, herriko emakumeen kolektibo bat aukeratzen du Erroxape Bermeoko Emakumeen elkarteak, eta Emakumearen Nazioarteko Egunaren harira, euren lana goraipatzen du. Aurten, Bermeoko sareginak aukeratu dituzte, eta beraiek egindako lanari esker ona adierazteko ekitaldia egin zuten atzo arratsaldean.Herriko saregin guztien lana eskertzeko omenaldia izan zen atzokoa; hala ere, denen izenean lau ordezkarik parte hartu zuten, belaunaldi ezberdinetako sareginek. Erretiroa hartuta daude dagoeneko Mari Karmen San Pedro eta Juani Maceira, eta oraindik, sareak josten ikus daitezke Maria Uriondo eta Bitore Urkijo.
19:00etan hasi zuten ekitaldia Erroxapek Erreten parkean duen egoitzan, eta hainbat lagun bertaratu ziren; haien artean egon ziren Benito Ibarrolaza eta Aingeru Astui zinegotziak.
Sareginek egiten duten lana ezagutzeko aukera eduki zuten bertaratutako guztiek, askorentzat ezezaguna den lana. Arriskuan dagoen ogibidea ere bada, gero eta gutxiago baitira bertoko portuetan sareak josteko prest agertzen direnak. Mari Karmen San Pedrok eta Juani Maceirak ondorengoei ogibidea irakasteko ardura hartu zuten. Euren lan egiteko moduaz aritu ziren atzo, eta gauza bera egin zuten oraindik lanean jarraitzen duten Uriondok eta Urkijok. Hala, lehengo zein oraingo lan egiteko modua ezagutzeko aukera izan zuten han bildutakoek.
Erroxapeko abesbatzak girotu zuen ekitaldia bere abestiekin, eta sareginen ordezkariek lore sorta bana jaso zuten elkarteko kideen eskutik. Amaieran, luntxa eduki zuten.
Saririk ez
Iaz, amamak izan ziren omenduak, euretariko askok lan handia egiten baitute. Orain dela bi urte, berriz, emakume baserritarrak izan ziren protagonistak.
Orain arte, narrazio laburren lehiaketako sariak emateko eguna ere izaten zen. Aurten, hala ere, ez dute lehiaketarik antolatu, lehenengoz. Diotenez, azken urteetan gutxitu egin dira lehiaketara aurkeztutako lanak , eta horien kalitatea ere jaitsi egin dela uste dute.
Horregatik, aurrerantzean, narrazio laburren lehiaketa bi urterik behin antolatzea erabaki dute.
