Taraska eta Gernika atletismo taldeetako kirolariak dominak lortu dituzte Euskadiko Txapelketan
Gernika Atletismo Taldeko eta Taraska Atletismo Taldeko hainbat atletek Anoetako pistan (Donostia, Gipuzkoa) lehiatu zuten Euskadiko Txapelketa, zapatuan.
Bermeoko taldetik lau dominagaz bueltatu ziren. Nagore Odiagak Euskadiko Txapeldun izatea lortu zuen, kadeteen 60 metroko proban.
Beste bi neska txapeldunorde geratu ziren; Ainhize Pradok zilarrezko domina jantzi zuen kadeteen 600 metroko lasterketan, eta junior mailan, berriz, Eneritz Campanok lortu zuen zilarra, 1.500 metroko proban.
Pisu jaurtiketan, gazte mailan lehiatu zen Garazi Lertxundik brontzezko domina eskuratu zuen.
Halaber, pisu jaurtiketako junior kategorian azpitxapeldun geratu zen Gernika Atletismo Taldeko Jonan Asturias; 11 metro eta 40 zentimetroko marka lortu zuen.
Gernika ATko Uxue Aurrek ere zilarrezko domina irabazi zuen junior mailako 800 metroko proban. Gernikarrak bi minutu eta 30 segundotan amaitu zuen lasterketa. Unai Lopato ere podiumetik hurbil geratu zen; gazte mailako 1.500 metroko lasterketan laugarren geratu zen, lau minutu eta 22 segundoko denboragaz.
Uriarte laugarren Hernanin. Bestalde, Gernika ATko Aitor Uriartek Hernaniko Sagar Lasterketan parte hartu zuen zapatuan, eta laugarren helmugaratu zen; bigarren sailkatu zen beteranoetan. 29 minutu eta 29 segundotan burutu zuen 9 kilometroko lasterketa.
Nagore Odiaga podiumean (erdian).
Argazkia. Taraska AT.
Gernika ATko Jonan Asturias zilarrezko dominagaz.
Argazkia: Gernika AT.
