Lapiko eta putxera txapelketa antolatu dute zapaturako
Alde Zaharra Bizirik elkarteak antolatutako hirugarren txapelketa izango da zapatukoa.
Parte hartu gura duten horiek zapatuan bertan eman beharko dute izena; 10:00etan, Goiko Plazako Kabidxe Gune Sozialean, eta lau euro ordaindu beharko dituzte. Hala ere, 08:00etan sartu ahalko dituzte gauza guztiak Alde Zaharrera.
Hiru motako indabak prestatzeko aukera izango dute parte hartzaileek: tolosarra, pinta edo nabarra eta Bizkaiko tolosarra. Indabaz gain, Indabaz gain patatak, barazkiak, urdaia, txorizoa, odolostea, txarri produktuak, saiheskia eta behi magal jartzeko aukera ere edukiko dute. Ez da derrigorrezkoa osagai guztiak erabiltzea, baina txorizoa, odolostea eta urdaia derrigorrez erabili beharrekoak direla esan dute antolatzaileek.
Indabak lapikoan egin beharko dituzte, derrigorrez; presioko lapikoetan egindakoak kanporatu egingo dituzte. Eta, parte hartzaileek aurkeztu beharreko gutxieneko kantitatea kilo bat izango da.
13:00ak eta 13:30ak bitartean prest egon beharko dira indabak, ordu horretarako aurkeztu beharko baitira txapelketarako prestatutako lapikoak.
Parte hartzaileek, kalean, jende aurrean, prestatu beharko dituzte indaba lapikoak; etxetik zer edo zer prestatuta eroaten dutenek kanporatuak izan daitezke. Gasa, ikatza zein egurra erabilita prestatu ahalko dira lapikoak. Bermeon txokoa daukatenek, txokoan bertan prestatzeko aukera ere edukiko dute, betiere, antolatzaileen kontrolpean baldin badaude.
Iaz, 24 putxera aurkeztu zituzten eta sari nagusia Armintzara joan zen.
SARIAK
Iazko txapelketako saridunak. Argazkia: Xabier Bilbao
- Lehenengo saria. 200 euro + txapela + oroigarria
- Bigarren saria. 150 euro + oroigarria
- Hirugarren saria. 50 euro + oroigarria
- 4.enetik 10.enera. Oroigarria
