Bermeoko Kafe Antzokiak Halloween Metal Festaren 10.urteurrena hartuko du zapatuan

Olaia Zabalondo

2017/11/01

Spookypheria Productions kultur elkarteak Halloween Metal Fest jaialdiaren 10.urteurrena ospatuko du zapatuan. Urtero legez, Bermeoko Kafe Antzokian egingo dute jaialdia, 21:00etatik aurrera.

Iazko kontzertuetako bat. Argazkia: Txaber Miravalles (Conserje del Universo Fotografia)

Metal genero ezberdinak eskainiko dituzten musika taldeak igoko dira zapatuan Bermeoko Kafe Antzokiko agertokira. 10. urteurrena ospatzeko, lau talde aukeratu dituzte. Ost talde bermeotarra izango da jaialdia zabalduko duen taldea. Horien ostean, Vila-realetik (Herrialde Katalanak) etorritako Killus taldeak jarraituko du musika jotzen. Ia gauerdiarekin batera igoko dira agertokia Crisix (Bartzelona, Herrialde Katalanak) taldekoak. Eta, jaialdia zarratuko du, berriz, Vita Imana talde madrildarrak. Kontzertuen ostean, jendeak gustuko dituen videojukebox-ak jarriko dituzte. Aurretiaz erosita, sarrerek 12 euro balio dituzte. Egun berean, leihatilan erosten duten horiek, berriz, 15 euro ordaindu beharko dituzte. HITZAk Halloween Metal Fest jaialdira doan joateko aukera emango die lau laguni; izan ere, harpidedunen artean bi lagunentzako bina sarrera zozkatzen ari da asteon. ORDUTEGIAK

21:00. Ateak ireki.
21:30. Ost.
22:25. Killus.
23:40. Crisix.
01:10. Vita Imana.
03:00. Videojukebox.